India-a Maggi instant Noodles khap a nih hnu lawkah UK Food regulator chuan India aṭanga Maggi an lakluh chu a him thu sawiin, lead a tam lutuk lo tih an sawi.
Thuchhuah an siamah, “Food Safety Agency chuan UK-a Maggi sample an test-ah lead awm zat chu EU-in a phal zat hnuai lam a awm a, mipui te tan a him lohna a awm lo,” tiin a tarlang a, hetianga Maggi an test chhan hi India-a Maggi te dawr aṭanga la let tura thupek a awm vang a ni tih an sawi.
Hetiang bawk hian ram dang – Australia leh Singapore te pawhin India aṭanga Maggi an lakluh chu a him tawk tih an lo sawi ve tawh bawk a ni.
Nesetle chuan khap a nih tak avanga Maggi an tihchhiat zawng zawng hlut zawng chu India pawisaa cheng vaibelchhe 320 (US dollar maktaduai 45) hû vel a ni tih an sawi a ni.
Hetihlai hian Bombay High Court-in mihring tana pawi thei thil a tel nia sawi a nih avanga khap, Maggi chu ram pawna hralh chhuah leh phalna, Nestle Company a pe.
Food Safety & Standards Authority of India chuan Maggi-ah hian mihring tana pawi thei, thil hang lam, danin a phal chin aia tam hmuh a nih avangin June ni 5 khan hralh chhuah a lo khap tawh a, Nestle Company chuan phalna nei thlapa zuar an nih thu sawiin, FSSAI chu an thuneihna piah lama khapna dan siamah a puh a, Bombay High Court hian Maggi hi ram pawna hralh chhuah phalsak mah se, ram chhunga hralh chungchang chu July ni 14-ah a ngaihtuah dawn a ni.