Nimina Serchhip-a Filling Station awm chhun PB Lalzuithanga Filling Station aṭanga Diesel lâk chhuahah tui a tam lutuk avangin lirthei neitu ṭhenkhat ten harsatna an tawk a, nimina Diesel an thunah hian tui a tam avangin an lirthei te a nung thei lova, lirthei pakhat phei chu an tlan laiin a khu luih a, a thi zui niin sawi a ni.
Hemi chungchangah hian Serchhip District Consumer Association President Pu H.Zonuntluanga chuan Legal Metrology Department an hrilh thu an sawi a, hetihlai hian Legal Metrology Depart-ment Inspector te hi an inthlak buai lai a la ni a, an hma lak dan hi kan hre mai thei lo a ni.
Zothlifim-in hemi chung-chang telephone hmanga Filling Station lam zawhfiah kan tum chu kan be pawp thei lova, amaherawhchu District Consumer Association Presi-dent chuan Filling Station nen an inbiak dan sawiin, Filling Station Manager chuan hetiang hian Tanker-ah tunhnaiah ṭum 2 tui a rawn tel tawh tih a sawi a, fimkhur viau ṭhin mahse fimkhur sen loh chang a awm tih a sawi a, nimin khan Diesel chu hralh chhuak lovin an siak chhuak vek tih an sawi a, an hnena Diesel la, harsatna tawk te chu an Diesel lak tawh sa te pawh an thleng let leh an phalsak mai bakah an lirthei leh khawlin a lo tuar a nih chuan an Workshop bill thlenga tumsak an inhuam thu an sawi niin District Consumer Association President chuan Zothlifim a hrilh a ni.