Central YMA chuan nimin zing khawvar hma khan Aizawl khaw daiah Silchar lam aṭanga ILP lem hmanga Aizawla luh ruk tum hnam-dang engemawzat an man a, heng mite hi Police kutah pe in FIR an thehlut nghal.
Nimina Central YMA thuchhuahin a tarlan danin, tun tumah hian Selesih leh Muanna Kudam vel bawrah maxi cab 3-a hnamdang chuang khat tlat an hmu a, heng mite hi Group ILP lem hmanga Aizawla luh tum an ni a, heng ILP lemah hian Mizo Officer te signature leh seal lem an hmang tih sawiin, hei hi Central YMA chuan ṭha a tih loh thu leh hetiang man chhuah te chu a na thei ang bera thuneituten hrem se an ti a ni.
Hetianga ILP lem hmanga Mizorama lut ru tur te hi nitin engawmawzat Maxi Cab driver ten an phur lut ṭhin tih an hriat thu sawiin Central YMA chuan, hemi chungchang hi sawrkar-ah an thlen tawh thu an sawi a, YMA Kumpuan ‘Ram leh hnam humhalh’ kawngah theihtawpa hma a la chho zel tur leh state chhunga Branch YMA zawng zawng te chu ILP endik runpui nei turin an hriattir tih an sawi a ni.