Nimin Assembly Budget session-ah sawrkar dân thar siamna tur bill pahnih – The Mizoram Fire Service Bill, 2013 leh The Mizoram Animal Slaughter Bill, 2013-te lungrual taka pass a ni.
The Mizoram Fire Service Bill, 2013 pu luttu Home Minister, Pu R.Lalzirliana chuan he bill hi Central sawrkar duhdan anga Ministry of Home Affairs Draft Model Bill duan chhuah zulzuia siam a ni tih a tarlang a, hei hi kangṭhelh pawl mite hman tur leh an hnathawh dan duan dan tur ruahmanna a ni tih sawiin, Police kangṭhelh pawlte hi Police hotu DGP hnuaia awm nimahsela, Police pangngai hnathawh ang thawk lo a, dân hran hmanga hnathawhtir ngai an nih avangin dân hran an neih a ṭul a, chutah chuan an inrelbawlna chungchang te, an service chungchang leh kangmei laka mipuite humhim tura hna an thawh dan tur te, hna thawk ṭha lo te hremna tur leh an hnathawh tibuai zawnga thil tih te hremna tur te a awm a ni a ti.
The Mizoram Animal Slaughter Bill, 2013 hi Mizo mipuite sa ei tur hrisel leh thianghlim pekna tur a ni a, a pu luttu AH & Vety Minister Pu Nihar Kanti chuan Mizoramah sawrkar ruat thuneitute phalna leh endik loha duhna hmun hmunah sa talha zawrh a nih ṭhin avangin hei hi mipui vantlang tan thil fel lo leh hriselna atan thil ṭha lo thlen theitu a ni a ti a, he dan hi hman anih chuan sa talhna hmun ruata sa talhna inah chauh sa talha zawrh chhuah a ni ang a, ran hrisel lo leh natna vei hmuh chhuah a nih chuan dah hrana enkawl a ni ang a, sa talh tawh zingah sa hrisel lo hmuh a nih chuan zawrh chhuah a ni lo vanga, a hri vei kai darh a nih loh nan chu sa chu tihral a ni ang a ti.
Thulakna tarlan danin he dan hmang thei tur hian AH & Vety Department chuan ruahmanna thui tak a kalpui tawh a, sa talhna hmun Aizawla Mualpui- a sak chu zawh tawh niin, karleh Thawhṭanni khian hawn beisei a ni a, Serchhip-ah hawn mai theih tura ruahman mek a nih bakah, Lunglei leh Champhai ah sak mek a ni bawk a, Kolasib leh hmun dangah pawh sak tura hmalak mek a ni bawk a ni.