Sawrkar laipui Ministry of Information & Broadcasting hnuaia Films Division chuan Mizorama Documentary, Film tawi leh Animated Film siam te a ṭul anga an ṭanpui theih thu leh hemi kawnga Mizoram mipui hip turin tun thla ni 25 leh 27 inkar hian Aizawl-a I & PR Auditorium-ah Mumbai International Film Festival-a film tawi chi hrang hrang a chhuah dawn tih a sawi.
Niminpiah khan khan Aizawla thuthar lakhawmtute kawmin, Films Division hotute chuan heng film leh documentary tawite hi minute 26:52 a seia ṭhen anih thu leh hetiang siam tumte chu an siam tur azira pawmsak anih chuan an ṭanpui thei tih an sawi a, Mizoram aṭangin hemi kawngah hian hmalakna a la awm loh thu sawiin, state dang aṭang erawh chuan tam tak an dawn ṭhin thu an sawi a, Mizoram chuan a la hmelhriat loh avangin he thil hmelhriat tur hian Mumbai International Film Festival-a film chhuah hun hi ruahman a nih thu an sawi a ni.
MIFF-in film a chhuah chhung hian state dang leh ram pawn aṭanga film siam chi hrang hrang Oscar Nominated Film ‘The Little Terrorist’ tih bakah Mizoram film siam pakhat Zodinpuii tih chu chhuah tel a ni ṭhin dawn a ni.