Skip to content

Khum 10 awmna Eye Ward Serchhip-ah hawng

Serchhip News

Chief Minister Pu Lal Thanhawla chuan nimin khan Serchhip JN Hospitalah National Programme for Control of Blindness (NPCB) sum hmanga sak, mit entirna in khum 10 awmna ‘10-Bedded Eye Ward’ a hawng.

Hawnna inkhawm Chief Medical Officer’s conference rooma buatsaihah Chief Minister chuan mit entirna hmun building tha tak hawn theih a ni chu rahbi thar pawimawh tak kan tuk a ni a, a lawmawm hle a ni, a ti a.A chhawrtu tur te hi a neitu kan ni a, a enkawlna leh a thianghlim thuah mawh kan phur a, a thar laia a fai ang hian fai taka vawng thianghlim reng turin mipuite a chah a ni. Pu Lal Thanhawla chuan Mizote hi ringtu inti, ei leh bara intodelha, hrisel ber awm tak, thlahnih daih pawh tharchhuak zo lo leh hrisello ber kan ni hi kan inbihchian angai hle a ni, a ti a. Hnam intodelh leh hnam ropui ni tur chuan kan taimaka, kan hrisel angai a ni tiin, hrisel tur chuan kan ei leh inah kan fimkhur a, kan hriselna tichhe theitu lakah kan fihlim a tul a ni, a ti a. Chuvangin kan khawtlang nun leh kan kalphung hi kan thlak danglam angai hle a ni, a ti. Doctor leh nurse te pawhin an mi enkawlte hnenah zuk leh hmuam that lohna hrilhhre thin turin a chah bawk a ni .

Hospitala damlo te kan kan danah Mizote hian inbihchian tur kan nei a ni a tiin, Chief Minister chuan damlo kan kanate biak kher kan tum thinte leh titina hmun ang maia kan hmang thin hian damlo te an nat belh phah fo a ni a ti a, zir tur kan ngah hle a ni, a ti a. Kan zavai hian a chhelai siam tha tura koh vek kan ni, a ti.

Chief Minister tawiawmtu Pu P.C.Lalthanliana, Minister of State for Social Welfare pawhin thusawiin, Serchhip chu Mizoram hmun laili ber awm a ni a, bialtu MLA Chief Minister Pu Lal Thanhawla hian heta tang hian rualkhai thei ang berin Mizoram hmasawnna a kalpui a, thingtlang kilkhawr ber pawh tlawh peihin Chief Minister taima ber leh rem hre ber nia a hriat thu a sawi a. Tun an sorkar chhung ringawt pawh hian Serchhip hmel chu nasa takin a danglam a ni, a ti.

Inkhawmah hian Pi Esther Lalruatkimi, Secretary, Health & Family Welfare in inlawmna thuchah a sawi bawk a ni.

Eye Ward hawn tak hi NPCB fund aṭangin `67,78, 000.00 senga sak a ni a. Mizopa chhiara chhawng thuma sang, damlo mutna tur khum 10 awmin, Operation Theatre (OT), consultation room, inthiarna, technical room leh conference room te a awm bawk a. Khawl hman tur Slit lamp, B Scan Ultrasound, Applanation Tonometer, SICS set leh a dang cheng nuai 8.5 man tunah hian chah mek a ni bawk. Doctor leh nurse te pawh dah fel tawh a ni.

1 thought on “Khum 10 awmna Eye Ward Serchhip-ah hawng”

  1. Va lawmawm thin ve aw… Heng facilities kan neih tha hi alawm, hengte hi alawm min ti khaw pui leh changkang tu mai mai chu … kan bial MLA / CM chu a va tawng fuh awm fuk fuk ve aw… Thil hi chu a hria maw le… a hmu thiam thluam zel..mahse amah tak hi chuan a sawi ang thil tha han ti tur hian a peih vak vak lemlo chu niin a lang…Engpawh nise..kan ram hruaitute hian an thil tha tih tum reng reng hi inthlan dawn kumah an khek deuh kher zel erawh hi chuan mipui nghakhlel taka lo beisei a, lo thlir dauh dauh tute a inhmuhsit thlak chu ka ti ve det…..kan al zia chho turah ngai ang….

Leave a Reply

This site uses Akismet to reduce spam. Learn how your comment data is processed.