MHIP Gen.Hqrs sum cheng nuai thum chuang eirua puh, Lalbiakengi, MHIP Gen. secretary chu Judicial Magistrate, Aizawl Judicial District, Gracy L Bawitlung chuan nimin khan thiam a chantir.
Lalbiakengi’n MHIP sum a eirua puhna thu-buaiah hian Court chuan nimin khan thutlukna a siam a; thiam a chan hnu hian Lalbiakengi chuan a thubuai leh thiam a chan chungchangah nimin tlai khan Aizawl Press Club-ah chanchinthar lakhawm-tute kâwm a ni.
Lalbiakengi chuan, a thubuaiah Pathianin hnehna a chantir chu ropui a tih thu sawiin, a thubuai chungchanga hna thawktu Aizawl SP leh a thawhpuite leh, judge leh a thawhpuite chungah a lawm tak zet tih a sawi a; hmeithaite leh mi rethei zawkte tan dikna tundin a harsa tih sawiin, “Tuna ka hnehna hi hmei-thaite, leh rethei zawkte tana mêllung a ni,” a ti.
Zawhna chhangin, Lalbiakengi chuan, April 26, Zirtawpni-a MHIP gen.hqrs. hruaitu thar thlan turah a chuh dawn leh dawn loh a la sawi theih loh thu a sawi a; MHIP Gen. Hqrs-in MHIP aṭangin kum 10 chhung atan an hnawt-chhuak nia sawi chung-changah, amah an hnawh-chhuahna lehkha a la dawn loh thu leh, amah hnawhchhuah an tum dan chu MHIP dan kalh a nih thu a sawi bawk.
Lalbiakengi ukil, C Zoramchhana sawi dan-in, Lalbiakengi lakah hian MHIP Gen. Hqrs president, B Sangkhumi’n Sept. 18, 2011-ah FIR a thehlut a; MHIP resolution lem siama SBI-a MHIP account pathum khar-ah te, New Market-a MHIP building luahtu mi pangate aṭanga MHIP hminga ` 2,70,000 pûk a, ama tana hmangah te, MHIP hminga SSA aṭanga ` 3,50,000 la chhuak a, ama tana hmangah leh, Transport department aṭanga sum la chhuaka ama tana hmangahte puh a ni.
Heng an puhnaahte hian Lalbiakengi’n thiam lohna a neih hmuh a nih loh thu, C Zoramchhana chuan sawiin, Court-in Lalbiakengi chu thiam a chantir a, Lalbiakengi thiam chantir a nih dan chu ‘acquittal’ a nih avangin, tuna a thubuai chungchangah thubuai siamsak theih a ni tawh lo tih a sawi a; April 19, 2013 khan MHIP president B Sangkhumi’n thubuai chu Court-ah hnuhdawh a dil a, mahse Court-in a remti lo niin a sawi bawk.