Mizoram News

Sa, Artui leh Bawnghnutea intodelh turin theihtawp chhuah

AH & Vety Minister Pu Nihar Kanti Chakma chuan, “Sa, Artui leh Bawnghnute-a kan intodelh theih na’n Vety department-in theihtâwp a chhuah mek a ni.” a ti.

Nimina Tlabung Branch YMA Rúna Vety Department hnuaia NLUP trade thlangtute hnena NLUP ṭanpuina sum semnaah hian, khuallian Pu Nihara chuan, “NLUP hi Mizoram tan malsâwmna a ni a, kan ram economy dinchhuahna programme a ni.” a ti a; NLUP Bâwng sem tur an phurh luhna lamah harsatna nasa tak an tâwk nia sawiin, “Kan doctor ṭhenkhatte phei chu an nunna atana hlauhawm dinhmunah an ding hial a ni.” a ti a, U.P, Haryana leh Punjab-ah te Bawng-in an sakhaw rinna nen inkungkaihna a neih avangin, Mizorama NLUP Bawng sem tur phurh luh chu a harsa hle tih a sawi.

Pu Nihara chuan, NLUP Bawng sem a nih hnu-ah, Mizoramin Bawnghnute a hnianghnar tih sawiin, “NLUP Bawng te hi hralh suma chantir tur ni lovin Bawnghnute-a kan intodelhna tur a ni a, hei hi a rah chhuah kan hmu mek a ni.” a ti a; NLUP Bawng thi te chu zángnadawmna ngaihtuahsak an ni tih sawiin AH & Vety minister chuan, “NLUP Bawng kher lo, Bawng dang thi te pawh zángnadawmna ngaihtuahsak an ni dawn a ni.” a ti bawk.

Nimina NLUP ṭanpuina sum 2nd phase, first instalment hi, Piggery thlangtu chhungkaw 196, Hill Cattle thlangtu chhungkaw 2, Poultry thlangtu chhungkaw 68, Dairy thlangtu chhungkaw 2, an vaiin chhungkaw 268 hnenah sem a ni a, a vaiin cheng nuai 43 leh sing 7 semchhuah a ni.