Saikhumphai hâlnaa mawhphurtu la man loh sawrkar chakloh vangah puh

Vaphai khua-in Saikhumphai bawk an hâl chungchang-ah tun thlenga mawhphurtu man an la awm lo chu sawrkar chak loh vang niin MZP leh MSU in an sawi.

He thil thleng hi sawr-karin a tih tur a tih loh vanga thleng niin nimina MZP leh MSU hruaituten Aizawl-a thuthar thehdarhtute an kawmnaah an sawi a, MZP President James Thang-hmingmawia chuan sawrkarin Vaphai leh Saikhumphai-a damdawi zuar emaw, zu zuar emaw, silai kawl an awm a nih chuan chhuichiang a, dan bawhchhia an awm chuan dân anga hrem ngei turin an phut tih a sawi a, hetihlai hian Saikhumphai hâltute, police pawhin an hriatchian leh police ngeite pawhin FIR an thehluh tawh hnu pawha tun thlenga thil sual titute man an la ni lo chu sawrkar chak loh vangah an ngai tih a sawi a ni.

Zirlai hruaitute an nih angin Saikhumphai-ah naupang 72 an zirlai an chhunzawm theilo an awm chu pawi an tih thu Zirlaipawl hruaitute chuan an sawi a, an zirlai an chhunzawm theih nan rang taka ruahmanna siam ni se se an duh thu an sawi bawk a ni.

An sawi danin, Saikhumphai khua hâl avanga in leh lo leh ram tihchhiat chu cheng Nuai 355 hu vela chhut a ni a, chenna in 39 leh in dang 6 a kangral bawk a, hemi chungchang chhui chiang turin zirlai pawl 2 hian ni 14 khan Champhai-ah FIR an thehlut a ni.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram