Mizoram News

Court-in Health Department motor 5 hreng dawn

Mizoram sawrkara Health Department te chuan tunah hian VL Nghaksanga Bazar veng Lunglei Pawisa cheng nuai 8 dawn an ba mek a, an pek duh mai loh avangin Health Depatrment Motor 5 te chu Court in a hreng dawn ta a ni.

Nghaksanga Ukil ZD Lalnunsanga chuan Health Deptt. hian Pangzawlah PHC hmun atan Nghaksanga ram hi hun reitak an luah tawh a, an luah (acquire) man hi sawrkar hian engmah Nghaksanga hnenah hian an pek loh avangin sawrkar chu court-ah an khing a, R.Vanlalchami Senior Civil Judge, Lunglei chuan ni 3.8.2012 khan thu-remna siamin assesment siam fel vek hnuah Health Deptt. chu cheng nuai 7 chuang zet compensation chawi turin tih a ni.

Nimin thleng khan sawrkar hian an la pe lova, an pek loh avang hian Execution petition file lehin a pungte nen cheng nuai 8 chuang chu pe tura tih an ni a, hemi hnu pawh hian Deptt. hian an la pe duh chuang lova, chuvangin CMO Office, Lunglei hnuaia Dept. motor 5 zet chu khawihsawn theihloh tura hrenbeh a nih dawn thu Nghaksanga hian a sawi tih thulakna chuan a tarlang.

– Zunzam Daily

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram