Kuminah Serchhip District-ah TB vei 15 hmuchhuak tawh

Serchhip District-ah kum 2012 khan TB vei mi 72 hmuhchhuah niin heng zinga 59 enkawl dam an ni a, pakhatin a thihpui a. Nikum 2013 ah khan TB vei 80 hmuh niin, an zinga 60 an dam a, pakhatin a thihpui a, kumin thla thum chhungah hian mi 15 hmuhchhuah leh an ni bawk.

He thu hi nimina khawvel puma TB (ngawr) natna dona ni puala Serchhip CMO Conference hall-a hun hmannaah Dr. Lalhlunpuii chuan a sawi a, khawvel pumah TB vei maktaduaih 9 vel zinga maktaduaih 2 zet chu India rama mi niin, Mizoramah chuan ramri hrula cheng Tuikuk, Chakma leh Myanmar mi te ah a la tam a ni a ti.

He inkhawma khuallian Pu Lalramliana Sailo Serchhip-III VCP in thu a sawi a. Pu Rama chuan TB chu hmanlaiah chuan natna ṭihbaiawm, a veite pawh khaw daia suan chhuah hial ṭhin niin, tunah chuan a veite enkawlna damdawi ṭha tak a awm tawh avangin natna ṭihbaiawm a ni tawh lova, chutih laiin mizote chu damdawia inenkawlna ngaih pawimawh kawngah ṭhanharh kan ngai nasa a ni a. TB laka inven leh a natna vei ten damdawi a hun taka ei an ngaih pawimawh theih nana theihtawp chhuah chu mitin mawhphurhna a ni a ti

Pu H.Laltanpuia TB control lama thawktu pawhin tB vei tihdam theih tawh loh, Multi Drug Registant (MDR) awmzia sawiin heng te hi damdawi ei mumal lo, zu thlah chuang lova damdawi ei thin te an ni a. Hengte hi an dam theih loh bakah an khuh leh hahchhiau atanga chhuak TB natna hrikte chu midangah tihdam theih loh TDR an kai chhawng nghal zel thei a ni a, fimkhur a ngai hle a ni a ti.

Nimina World TB day Serchhipa hmannaah hian TB vei enkawl dam tawh Chhingchhip a mi nula pakhat pawhin thu sawiin, TB natna chu tihdam awlsam tak a nih tawh avangin a vei nih a zahthlak loh a ni a ti bawk.

Kumin World TB day thupui hi- TB vei hmuh hmaih te zawng chhuak la, enkawl rawh tih a ni.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram