Stanislas Wawrinka chuan Novak Djokovic hnehin French Open title a la.
Rolland Garros-a Pathianni zana inkhelah hian Swiss eighth seed Wawrinka hi rin phak bakin a khel ṭha a, Djokovic hi 4-6, 6-4, 6-3, 6-4-in a hneh a, kum 33 mi, Wawrinka tan hei hi Grand Slam title 2 a lakna niin, hnehloh nei lova match 28 chhung Djokovic kal tluang lai chu a tihtawpsak bakah, Djokovic-a’n Grand Slam title lak kim vek a beiseina pawh a tihtawpsak leh ta rih a, Djokovic tan Grand Slam title la kim tur chuan alo berah thla 12 tal a nghah leh phawt a ngai dawn a, Djokovic hian French Open title la se chuan Grand Slam hrang hrangah a champion kim ve thei ang a, player ropui Andre Agassi, Don Budge, Roy Emerson, Roger Federer, Rod Laver, Rafael Nadal leh Fred Perry te zingah a tel ve thei tawh tur a ni.
An inkhelh zawh hnuin Wawrinka chuan, “Court chhung boruak kha a ropui a khatiang kha ka la tawng ngailo. Ka coach Magnus Norman hnenah lawmthu sawi ka duh, final-ah ilo vanduai tawh a mahse tun ami hi i tan leh ka tan a ni.” tiin a sawi a, Final-a a hneh tak Djokovic pawh vawi khat tal chu French Open-ah a champion a rin thu a sawi bawk.
Wawrinka hi Roger Federer hnua Swiss mi French Open-a champion leh thei awmchhun a ni a, Wawrinka hian Federer hi quarter-final-ah a vawthla nghe nghe.
Final-a chak zo ta lo Djokovic hian French Open final-ah vawi 3 a tlawm ta a, 2012 leh 2014 khan Final-ah hian alo chaklo tawh bawk a ni.