MZP chuan mi rinawm leh mi dik te chawimawi an nih a, ṭhangthar ten midik leh rinawm ngaihsan nachang kan hriat zel theih nan Mizo Politician leh Mizo Officer zinga eirukna leh hlemhlêtna laka a fihlim ber thlan chhuah a tum.
MZP chuan thuchhuah siamin, Mizo Politician leh Mizo Officer eirukna leh hlem-hletna laka fihlim lo ṭhahnem tak an awm nia hriat a ni tih an sawi a, hetianga inhnam-hnawih, an pawisa lakluh/hlawh phu lo a hausa te pawh kan ngaisang lo ṭan ta tial tial a, chutihlaiin kan Mizo Politician leh Mizo Officer tamtak zingah eirukna leh hlemhletna lak aṭanga fihlim an awm ṭeuh a ni tih MZP chuan a ring tlat a, heng eirukna leh hlemhletna laka fihlim te hian hriat an hlawhloin, ngaihsan an hlawh tawk lo niin MZP chuan a hria a, eirukna laka ta fihlim ber Mizo Politician leh Mizo officer thlang chhuak tur hian MZP chuan chanchinbu mite leh prominent citizen te thawhpuia sawmin sub-committee te siam a ni a, eirukna laka ta fihlim ber Mizo Politician leh Mizo officer thlan sub-committee chuan hma la in meeting pawh vawi 4 neih a ni tawh tih an sawi.
Mizo Politician leh Mizo Officer eirukna laka ta fihlim thlan chhuah dan tur chungchangah MZP chuan hetiang hian thlan nise a ti a – Eirukna laka Mizo Politician fihlim thlan tura chuan Member of Legislative Assembly (MLA) lo ni tawh chin la damlai te aṭanga thlan chhuah nise tih a ni a, Mizo Officer bika eirukna lak ata fihlim thlan chhuah dan tur chungchangah chuan Mizo Officer zingah Gazetted officer chin service lai te aṭanga thlan tur a ni a, Mizo Politician leh Mizo Officer eirukna lak ata fihlim ber pakhat thlan chhuah nise, chawimawina chu a sang 3 (top-3) te hlan nise tih a ni.
Eirukna laka fihlim ber Mizo Politician leh Mizo officer thlang chhuak tur hian Mizo-ram mipui zawng zawng vote neih tir chu a hautak tham dawn avangin Mizo mipui aiawh turin – NGO Office Bearer chin, Gazetted Officer chin, Mizoram University zirlai, Mizoram Law college zirlai, Sawrkar Pisa-a cashier leh accountant, Higher Secondary School zirtirtu, College professor leh SU Leaders, Chanchinbumite, Mizoram BAR Association member, Political Party (vote 10 theuh), Kohhran hrang hrang (vote 10 ṭheuh), AMC Councellors, Mizoram chhunga Bank hrang hrang (vote 5 ṭheuh).
Eirukna laka fihlim ber Mizo Politician leh Mizo officer thlanna hi District Headquarters tina kalpui tura ruahman a ni bawk a, MZP chuan eirukna laka fihlim ber Mizo Politician leh Mizo officer thlan chhuah kawngah hian rilru tianghlim tak senga vote thlak turin a thlang chhuak thei chinte chu a ngen a, kan rama eirukna leh hlemhletna a bo zel theihna a nih beiseiin he thil hi buatsaih a ni tih Zoram mipuiin minlo hriatsak turin an duh tih an sawi a, eirukna laka ta fihlim ber Mizo Politician leh Mizo officer thlan hi June ni 22, 2015 hian MZP Conference hall MZP Pisapui-ah Pu Vanlalrema Vantawl, President MJA chuan a hawng dawn a ni.