Ṭâm nia sawi khua Tuisentlang Minister-in tlawh

Tuisentlang khua an ṭam nasa a, ni 4 lai chaw an nghei tawh tih social media vela theh darh chungchang hrechiang turin Zirtawpni khan Disaster Management Minister Minister Pu C.Ngunlianchunga chuan he khua hi a tlawh a, an harsatna te sutkian dan tur a ngaihtuahpui.
Thulakna tarlan danin Tuisentlang khua hi Lawngtlai West Assembly bial huam chhung, Lawngtlai khua aṭanga Km 170 vela hla-a awm a ni a. In 130 Khua niin, mihring 500 vel an khawsa mek a ni. Lo neiha eizawng an ni a. Nikum khan an khaw ram chhunga rawṭhing chu a tâm vak mai a, chumi avang chuan Sazu te’n an Buh an eisak ta niin an sawi.

Kum dangah chuan Ration nena ṭangkawpin an buh tharte nen harsatna an tawk ngailo nia sawiin, kuminah chuan Sazu-in an buh a tihchhiat avanga Ration an khawpkham loh thu pawh an sawi a. Kumtin Bahra hi an lai ṭhin a, thingpui hmeh atan te an hmang ṭhin a, Buhfai an neih loh avanga tunhnaia lai ta vak an nih loh thu an sawi bawk.

Pu C.Ngunlianchunga chuan Tuisentlang mipuite har-satna chu sawrkarin a hriatpui thu sawiin, sazu puang avanga harsatna an tawh chu an VC ten Sawrkara Report an pek loh avanga an hriat lawkloh avang a nih thu a sawi a. Chhungkaw tin Ration dawn tur Thlakhat Quota chu pek nghal an nih tur thu sawiin, hmeithai leh harsa zual tak tak chhungkaw 30 Ration khulna tur pawh an kutah a hlan nghal a ni.

Minister hian Vaṭhuampui khuaa kudam tlawh nghalin, buhfai dinhmun a enfiah nghal a, Kudam-ah hian Buhfai Quintal 554 awmsa bakah Minister-in a tlawh mek lai hian Quintal 210 thlen belhin, Vaṭhuampui Godown in a châwm khaw 11 te February thla Quota leh thlakhat dang Quota chu tuna awmsa hian a daih thu Store Keeper chuan a sawi bawk.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram