Cricket-a Pakistan tana puh mi 15 Jail-ah khung an ni

Champion’s Trophy Final-a India leh Pakistan an inkhelh ṭuma Pakistan team te ṭana puh an nih avangin Madhya Pradesh Burhanpur District-a Mohad khaw mi 15 te chu Police-ten an man.

He cricket final Match-a Pakistan-in hnehna an chan hnu-a Pakistan Champion lawmna an au chhuahpui avanga man te nimin khan Bail-a chhuah an ni a, Police te hian sawrkar pawisawi (Sawrkar laka hel tura infuihpawrhnaa inhnam-hnawih) ah puhin thubuai an siamsak a, hetiang thubuai hi bail theih loh leh damchhung lung in tang tura hrem theih an ni a, mahse he an thubuai hi hlihsak an ni a, hnam inpumkhatna (Communal Harmony) tihchhiat tum thubuai siamsak an ni leh ta zawk a, heng an mi man te hi Muslim sakhaw betute vek an ni a, Police thubuai siamsak hi an khuaa mi tho, Subash Koli chuan a khing lêt mek a ni.

Police te sawi dan chuan heng an mi man te hian Cricket Final match an khelh lai leh Pakistan an champion hnu khan hâl mawi te hâlin, Pakistan ṭanna thu an au chhuahpui bakah Sweet te pawh an sem tih an sawi bawk a ni.

Hetihlai hian Subash Koli-a’n Court a hrilhdan chuan an khuaah chak lawmna a awm lova, Sweet sem a nih loh bakah Pakistan ṭanna au chhuahpui a awm lo tih a sawi a, Police te chuan amah bumin, phone hmangin Complaint diklo thehlut turin an ti a, an bum avangin ziakin complaint a siam phah tih a sawi a, Police-ten an tihbuai loh nan kar tawp khan a biru nghe nghe niin a sawi a ni.

Heng mi 15 te hi an bail dilna court-in a hnawlsak avangin Khandwa Jail-ah chawlhkar khat aia rei an tang hman a ni.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram