Nimin khan New Secretariat Conference hall-ah Local Administration Department (LAD) leh SIRD ṭangkawp chuan Village Council (VC) leh Panchayati Raj Institution (PRI) khaikhinna, VC aṭanga PRI a inleh a ṭul em tih chungchangah te official, VC, Party hruaitute leh mipui aiawh te tan inrawnkhawmna leh zirchianna hun buatsaih.
He inrawnkhawmna hi LAD Minister Pu PC Lalthan-liana leh Pu K.Lalrinthanga, Parliamentary Secretary, LAD, etc., te chuan an hmanpui a, LAD Minister chuan inrawn-khawmna hunah hian thuhma-hruai sawiin LAD enkawlna hnuaia Village Council inrelbawl-na kalphung chu her danglam leh khawvel ṭhang zel mila siam ṭhat fo a ngai a ni tih a sawi a, India ram hmasawnna atana pawimawh leh democracy-in a ken tel chu thuneihna insemzai a nih thu a tarlang a, Central sawrkar nena thawhdun a rem-chan zawk nan Mizoram sawr-kar pawhin State Finance Commission, State Election Commi-ssion leh Women Seat Reservations a tipuitling tawh a, State-in a ṭhatpui dawn phawt chuan Mizoram sawrkar chuan VC aṭanga PRI a inleh rawtna pawh zirchian leh tum a ni a ti.
Pu PC Lalthanliana chuan tunhnaiah Mizoram sawrkar chuan Central sawrkar chak zawka a thawhpui theih nan Department ṭhenkhat hming pawh Cabinet Meeting thutluknain tihdanglam a remti tawh a ni a ti.
Pu K.Lalrinthanga pawhin ‘Extended consultation Meeting on Conversion of Village Council Into Panchayati Raj institution’ neih a lo nih dan chungchang a sawi a, sawrkarin mipui leh mithiam khawhawi zau zawk te rualawhna a hriatthiampui a ni tih tarlangin, VC aṭanga PRI inthlak rawtna pawh, thil tih chi leh Mizoramin a mamawh thei dawn em tih uluk taka ngaihtuahho a ngai a ni a ti.
Nimina inrawnkhawmna neih hi Pu Rodney L.Ralte, Secretary, LAD-in a kaihruai a, sawihonna leh inrawnkhawm-na neih hma hian Pu Lallian-chhunga, Asst. Professor, Mizoram University chuan VC leh PRI chungchang zirchian-na a buatsaih tarlanna leh sawifiahna hun a hmang a ni.
VC leh PRI khaikhinnaa an danglamna langsar deuh te chu an term hi kum 5 chhung ve ve nimahse VC term chu thla 18 chhung pawhsei theih a nih laiin PRI member te term chu pawhsei emaw pawh tawi theih dan a awm lova, term ral hma thla 6 chhunga inthlan buatsaih hman tur a ni thung.
Ward/Bial- VC member te chu khawchhunga vote nei zawng zawng thlan an ni a, bye-election-ah pawh voter zawng zawngin an thlang leh a, PRI member te erawh chu khawchhungah dinna tur bik ward/bial nei an ni a, chumi chhunga voter chiahin an thlang a, bye-election ah pawh ward chhunga voter chiahin an thlang a, ward/bial chhunga mipuite tan PRI member chuan mawhphurhna a nei sang hle a ni.
Seat Reservation hi VC ah kum 2014 aṭang khan hmeichiate tan seat hmun thuma ṭhena hmun khat hauhsak an ni a, PRI-ah pawh hmeichiate tan seat hmun thuma ṭhena hmun khat hauhsak an ni a, Seat reservation hi voter an tam dan a zirin SC/ST tan hauhsak leh theih a ni a, SC/ST tana hauhsak lehchhawng seat hmun thuma ṭhena hmun khat chu hmeichhiate tana hauhsak leh tur a ni.
VC te sumhnar pui ber chu ranchhiah an lak aṭanga sawrkar nen 50:50 a an insem te, thubuaia chaklo te Rs.500 thleng an chawitir te, VC Court a inlan lo te Rs.100 chin an chawitir, hnatlang phatna Rs.25 leh hnatlang awlrute ‘runna’ Rs.50 te hi an sum hmuh (own source) chu a ni tlangpui a, Gram Panchayat te thawhchhuah (own source) chu a tam thei hle thung a, House/building tax, motor registration fee, bazar fee, dawr license fee leh user charge hrang hrang aṭang tein sum an la lut thei thung a ni.