Khawpuia chenna in neilote chenna hmun sak mek kalpui dan tur rel

Nimin khan Serchhip District Executive Committee on DAY NULM te chu an Chairman Pi Sangchhin Chinzah, Serchhip District Bawrhsap ni bawk hovin an ṭhukhawm a, DAY NULM Component, Shelter for Urban Homeless hnuaia Shelter Home sak mek leh City Livelihood Centre a taka kalpui chhoh dan tur an rel.

Pi Sangchhin Chinzah chuan khawpuia mirethei zawkte, chenna neilote, hnathawh tur mumal neilote, insakna neilote hmakhawsuih nan sawrkar chuan nasa takin hma a la mek a, Serchhip District-ah pawh hmalakna tam tak a nei a, a taka thawktuten hmalakna hmantlak, rahchhuak tlak ngeia hma an lak a ṭul a, chuvang chuan ruahmanna pawh fel tak neih a ṭul a ni, a ti.

DAY-NULM hnuaia Shelter for Urban Homeless hnuai-ah hian UD&PA Serchhip hian Social Welfare Department te nena thawhhona siamin tunah hian Serchhip P&E Veng ah Shelter Home cheng nuai 20.08 sênna tur sak mek a ni a, he Shelter Home sak hi UD&PA in Shelter for Urban Homeless fund hmanga sain a luah leh enkawl zui hna chu Social Welfare ten an bawhzui thung dawn a ni. He Building sak mek hi tlema tihdanglam ngai, Toilet hûnna siamrem ngai a awm avangin nimin meeting hian tukin zingah a hmuna ena hmalak dan tur sawiho nise, tiin an rel a ni.

Tin, City Livelihood Centre dinna tur pawh Serchhip District tan cheng nuai 10 hmuh a ni bawk a, he Centre a taka kalpuina tura proposal buatsaih niin sawiho nghal a ni a, he Centre hi nitin hnathawh tur nei mumal lote hnathawh tur zawn saka, a ṭul ang zela ṭanpuitu tur office/centre a ni a, chung hnate bakah chuan internet hmanga mipuite mamawh hna chi hrang hrang thawhsak thei tura duan a ni.

Nimina meeting chuan sum awm chhun hmanga he City Livelihood Centre (CLC) kum thum chhung amaha kal a, a hnu zela amaha a inenkawl zui theih dan tur ruahmanna chipchiar tak (detail proposal) siamin, thuneitu sang zawkte hnena thlen a ni ang a, annin an lo pawm chuan a taka kalpui nghal a ni tawh dawn a ni.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram