Nimin zing khan Serchhip Bazarah Antyodaya Yojana-National Urban Livelihoods Mission (DAY-NULM) Rally, UD&PA Serchhip Office huaihawta neih a ni a, NULM kaltlanga ṭanpuina leh enkawlna dawng mimal leh Self Help Group member ṭhahnem tak an tel.
He Rally hi Serchhip Tuikhuah Veng aṭanga neih ṭan niin, Rally kaihruaitu District Project Officer, NULM Pu Beitlotha Nohro, MCS chuan DAY-NULM Rally buatsaih chhan sawiin, khawpuia chêng mi harsa zawkte khai chhuahna programme hrang hrang te, mahnia eizawnna dinna tura loan ruahmanna te, Self Help Group hmanga indâwmkânna kalpui mek te mipuiten zau zawka an hriat theih nan leh khawpui hmasawnna tura mitin mawhphurhna hrang hrangte inhrilhhriatna atana buatsaih a nih thu a sawi.
He hmunah hian Pu K.Saitluanga, DIPRO chuan New India Movement thutiam (Pledge) 2017-2022 chu kalkhawmte aiawhin a chhiar chhuak a ni.
He mi hnu hian Bazar ah hun hman leh niin, hetah hian Pu K.Saitluanga, DIPRO chuan Swachh Bharat thutiam chhiar lehin, DAY-NULM Serchhip District Manager Nl. Grace Lalrinfeli leh Nl. Lawmzuali ten DAY-NULM hnuaia hmalakna leh ruahmanna hrang hrangte sawifiahna an nei bawk.
DAY NULM hnuaiah hian Serchhipah hmalakna hrang hrang kalpui mek a ni a, an hmalakna zingah Employment through Skill Training (EST&P) hmalakna hnuaiah kum 2015 aṭanga tun thlengin mi 462-in eizawnna tlak thiamna chi hrang hrang an zir chhuak tawh a, Self Employment Programme (SEP) hmalakna hnuaia guarantor ngailo leh a pung tlêmin eizawnna bul ṭanna loan pêk a ni a, mimalin cheng nuai 2 chin leh Group emaw Self Help Group-in cheng nuai 10 chin an pûk thei a, Interest hi 7% a ni a, Serchhipah chuan mimal 20, Group 1 leh Self Help Group 10-in SEP hi an hmang ṭangkai mek a ni.
Social Mobilisation and Infrastructure Development (SM & ID) hmalakna hnuaiah khawpuia miretheiten hma an sawn theih nana Grassroot level-a Self Help Group, Area level-a Area Federation, khawpui huapa City Federation dinpui leh an bul ṭanna tur sum tumsaka vilzuina a ni a, Serchhip-ah hetiang Group hi 124 din an ni tawh a, la din belh chhoh zel a ni.
Shelter for Urban Homeless (SUH) hmalakna hnuaiah chênna in neilote tan P&E veng-ah in sak mek a ni a, Home awmsa hrang hrang hnenah ṭanpuina engemawzat pek an ni tawh bawk a, Support to Urban Street Vendor (SUSV) hmalakna hnuaiah kawngkama inpho ṭhin, bungraw zuar ṭhinte ṭanpuina hna thawh mek a ni a, Serchhip-ah Streer vendor hi mi 112 awm mekin, anni ho hi Card te siamsakin, Vending Plan te siam mek a ni a, Serchhip hi City Street Vending Plan-ah Mizoram pilot Project atan thlan a ni a, Detail Implementation Plan pawh siam fel tawh a ni.
City Livelihood Centre (CLC) hmangin khawpuia mirethei ten an service an hralh theihna tur Centre emaw Information Centre emaw sak a ni dawn a, Serchhip atan bik tunah cheng nuai 10 sanction a ni tawh bawk a ni.
Heng hmalakna hrang hrang te bakah hian chenna in neilote tana in sak sakna programme Pradhan Mantri Awas Yojana (PMAY) Housing For All chu kalpui reng a ni bawk.