District Sport Committee-in thisen pek runpui a buatsaih

Sports & Youth Services Department-in ruahmanna a siam angin Serchhip District Sports Committee chuan nimin khan CMO Conference Hall Serchhipah a mamawh apiang te hman turin thisen pek runpui a buatsaih a, mipa 42 leh hmei-chhia 6-ten thisen unit 48 an pe.

He hunah hian khuallian Pu R.Vanrengpuia, SDO (S) Serchhip chuan thusawiin Sports & Youth Services Department-in hetianga ruahman-na siam nachang an hria chu fakawm a tih thu a sawi a, thisen pek chu a mamawhtu damlote tan nunna chhantu pawimawh tak a ni thei a ni, a ti a, khawvel thiamna hmanga siam chhuah theih loh thisen hlu tak, midang tana pek duhna thinlung neitute an fakawm tak zet a ni, a ti a, khuallian hian he thisen pek runpui hi a hawn hnuah thisen a pe hmasa ber zui a ni.

He hun hi Pu Lalremruata Ralte, Chairman Serchhip District Sports Committee chuan kaihruaiin, hun hmanpuitu dang, Pi Lalrampari, Sr. Coach, Sports & Youth Services Department pawhin Blood Donation neih a nih chhan a sawifiah a, Sports & Youth Services Department hian Sports discipline hrang hrang leh Youth Services-Scouts & Guides, Adventure, NCC, NSS, NYK, YHAI & Mizoram State Sports Council, etc kaltlangin naupang aṭang ṭhalai zawk te kawng hrang hrangin kum 30 chuang a lo kaihruai tawh a, ṭhalaite kaihruaitu Department a nihna ang ngeiin midangte tana malsawmna leh nun chhanna turin thisen pek runpui hi District zawng zawngah ni 6 -8 September, 2017 chhung hian hian buatsaih a ni a ti a. Sports & Youth Services Department aiawhin Serchhip District Sports Committee te hnenah hian infiamna bungrua eng emaw zat a hlan nghal a ni.

Nimin thisen pek rinpuiah hian Serchhip District chhunga Sport Association hrang hrang hruaitute leh memberte an kal ṭha hle a ni.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram