Maria Sharapova chuan Timea Babos hnehin Third Round a lut a, Babos hian set hmasa ber a lak hnuah Second Set-ah 4-2-in hma a hruai leh hman a, mahse First Round-a World No. 2 Simona Halep hnehtu Sharapova hian darkar 2 leh minute 20 chhungin Babos hi 6-7 (4-7), 6-4, 6-1-in a lehthal a, Third Round-ah American wildcard Sofia Kenin a hmachhawn dawn a ni.
Kum 37 mi, Venus Williams pawhin France nula Oceane Dodin chu 7-5, 6-4-a hnehin Third Round a lut bawk a, Wimbledon Champion Garbine Muguruza chuan awlsam takin Ying-Ying Duan chu 6-4, 6-0-a hnehin Second Round a paltlang a, Fourth seed Elina Svitolina chuan Katerina Siniakova chu 6-0, 6-7 (5-7), 6-3-a hnehin Third Round-ah Evgeniya Rodina a hmachhawn bawk ang.
Eighth Seed Svetlana Kuznetsova chuan match point 3 zet a save hnu-ah kum 18 mi, Marketa Vondrousova lakah 4-6, 6-4, 7-6 (7-2)-in a chak a, ṭum hnih Wimbledon champion lo ni tawh Petra Kvitova chuan Seeded 13th Alize Cornet chu a hneh a, 20th seed Coco Vandeweghe chuan 2-6, 6-3, 6-4-in Alison Riske a hneh a, Licie Safarova pawhin Second Round a paltlang bawk.
Hetihlai hian ṭum hnih US Open final lo khel tawh Seeded 5th Caroline Wozniacki chuan Second Round paltlang zo lovin 6-2, 6-7 (5-7), 6-1-in Ekaterina Makarova lakah a tlawm a, 11th seed Dominika Cibulkova pawhin Sloane Stephens hneh lovin Second round-ah a tla bawk a ni.
Mipa lamah Fourth seed Alexander Zverev chu Borna Coric chuan a vaw tla a, German kum 20 mi, Averev hian First set a la zet a, mahse 3-6, 7-5, 7-6 (7-1), 7-6 (7-4)-in Coric hian a lehthal ta a ni. Zverev hian kuminah title panga lai la tawh mahse Grand Slam-ah chuan last 16 chung lam a la thleng lo a ni.
US Open ni thumnaah hian Seeded player zingah Gilles Muller, Albert Ramos-Vinolas, Fabio Fognini leh Richard Gasquet te chuan Second Round an paltlang zo lova, hetihlai hian Wimbledon finalist leh fifth seed Marin Cilic chuan Florian Mayer chu 6-3, 6-3, 6-3-in a hneh a, Czech 15th seed Tomas Berdych pawhin Ryah Harrison chu 6-4, 6-2, 7-6 (7-4)-in a hneh a, Juan Marton de Potro chuan 24th seed Henri Laaksonen chu 6-4, 7-6 (7-3), 7-6 (7-5)-a hnehin third round a lut a, Flushing Meadows-ah hian Grigor Dimitrov, Dominic Thiem leh John Isner te pawhin Second Round an paltlang bawk a ni.