Categories
Chanchinthar Mizoram

AR leh IAF chhuak tura nawrin kawng zawh

Inrinni khan Lunglei Pukpui khawtlang chuan an ram chhunga sipai awm mek Assam Rifles (AR) leh Indian Air Force (IAF) te chu chhuak tura nawr na’n kawng an zawh.

Pukpui khawtlang kawngzawhte hian an lungawi lohna leh an thil ngiatte an auchhuahpui a. IAF-te hian mimal 26 ram an luah mek a, ram neitu te hian an ram hi hralhin sipai hian hmun nghet an nei a nih chuan sawrkarin Air force-te a phal sak angin a chheh vel km 1 bial chu an duh duhin an nei thei dawna a lan avangin Pukpui khaw tan a him lo tih an sawi a. Hei bakah hian Pukpui hi Lunglei khaw zauhna remchang leh hmun pawimawh tak la ni chho tur a nih avangin tun aṭanga humhalh chu a ṭul a ni an ti a, chuvang chuan Pukpui ram luahtu sipai te chu a rang thei ang bera chhuahtir an phût tih an sawi.

Pukpui khawtlang chuan Resolution pass-in Pukpui ram chhungah Force-ho tan mi tumahin an ram pek emaw leitir loh nise, Pukpui khuaa sipai ram luah duh lohna lantir na’n khawtlang huapa hma lak nan a ṭul angin, Kawngzawh, Bandh neihte leh Sipai tana ram pek an duh lohna President of India leh Prime Minister hnenah Memorandum thehluh ni se, an ti a. Indian Airforce-ten Pukpui a hmun nghet nei tura hma an lak mekah hian Pukpui VC-te leh Lunglei bawrhsapte’n phalna (NOC) pe lo se tiin an ngen a ni.

Mizoramin remna leh muanna a neih tawh hnu kum 1986 aṭanga tun thlenga sipai-ten ram a la luahsak chu an hrethiam lova, Pukpui khuain remna leh muanna tak tak an hmuh theih na’n a rang thei ang berin an ram luah chu chhuahsan rawh se an ti a. Mizoram sawrkar hian tuna sipai ram luah chhunga mite ram LSC an pek theih chuan a bak sipai-ten ram an luahsak hi a neitu diktak hnenah LSC siamsak ve rawh se an ti bawk a. Pukpui ram khaw hlui leh Kawmzawla sipai-ten an ram la luahsak mek chu Restricted Area a nih leh nih loh sawrkarin ram neitute hriattir se, Restricted area a nih chuan hlip rawh se tiin, an pi leh pu-te aṭanga Pathian biakna hmun pawimawh, an Biakin hmun sipaiten tun thlenga an la luahsak chu chhuahsan rawh se an ti bawk.

By Editor

C.Lalrochhuanga,
New Serchhip, Serchhip - 796181
Mizoram
Contact: WhatsApp | Phone Call | Telegram