Health Care pawm lo damdawiin hnâwl tum

Health Secretary H.Laleng-mawia chuan damlote inenkawlna health care pawm lo private damdawiin te chu sawrkarin a pawmna ‘empanel’ tihtawp thlengin hmalak a tum tih a sawi.

Mizoram Health Care Scheme leh AB-PMJAY chung-chang sawihonaah he thu hi sawiin Health Secretary chuan MHCS leh AB-PMJAY te chu Mizoram chhunga sawrkar dam-dawiin bakah private damdawi-in 4 – Eye Care, Nazareth, Med Aim Champhai leh Lairam Christian Medical Centre & Hospital, Lawngtlaiahte a hman theih tih a sawi a. Tuna sawrkar-in rate a hman mek chu private damdawiinte nen an sawiho hnuah zawh tawk nia hriain tuna rate ang hi an bithliah ta niin a sawi a. “Rate chungchang hi private damdawiin te nen vawi duai lo kan sawiho a, awm tawk nia kan hriatah kan bithliah ta a. Gazette a chhuah hnu, la hman hma hauha tihdang-lam leh nghal ngawt hi a dik lo a. Kan hmang phawt ang a, a ṭul angin la ennawn zel tur a ni,” a ti.

Health Secretary chuan health care pawm lo damdawi-in bill chu sawrkarin a pek theih dawn loh avangin mipuite fim-khur se a duh tih a sawi bawk.

Mizoram State Health Care scheme hi October ni 1,2019 khan Chief Minister chuan a hawng a, private damdawiin te chuan sawrkar rate siam an pawm theih loh thu hi October ni 7,2019 ah sawrkar an hriattir a, November ni 1,2019 khan sawrkar chuan chhanna a pe ve leh a ni.

Health Secretary chuan Mizoram chhunga damdawiin hrang hrang te chu an hmanrua leh building te a inanloh em avangin sawrkar chuan thliarhran (categorisation) neih a tum tih a sawi a. He thil hi Directorate of Hospital & Medical Education lamin an buaipui mek niin a sawi bawk.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram