Mizoram Larsap PS Sreedharan Pillai chuan Mizoramin mau hmanga eizawnna a siam kawngah sawrkar laipui ṭanpuina lian tham zawk a mamawh a ni, a ti.
Nimina Rashtrapati Bhavan, New Delhi-ah Conference of Governors vawi 50-na-ah he thu hi sawiin larsap chuan Mizoram chhunga sum chang thei thil tam tham ber chu mau a ni tih a sawi a. Mau hmanga eizawnna siam kawngah Mizoram sawrkar chuan chak takin hma a la mek a, a hlawhtlin tak takna tur chuan Central sawrkar puihna lian tham zawk mamawh a ni a ti a. Mizoramah nasa taka hriselna lam Health Care system tihchangtlun a pawimawh thu a sawi bawk a. Damdawiin changtlung zawk, tunlai thiamna hmanga siam damlo enkawlna khawl changkang zawkte state mipuiin an mamawh em em laiin a la tlêm hle a. Inkalpawhna kawngpui tam zawk siam a la ngai a. Tun dinhmunah chuan thih leh dam kara hmanhmawh taka damdawi in pan a ṭul changin harsatna lian tak damloten an tawk mek a ni a ti.
Larsap chuan Mizoram chhunga pawl hniam zawk zirna sikulte a awm tam rualin pawl sang zawk zirna school tam zawk Central sawrkarin a din belh a ṭul hle a ni a ti a. CBSE sikul tam zawk Mizo-ramah din a nih theih nan hmalak a ngai a, thingtlang khawlian deuh, College awm-naah te phei chuan tlangmite te puala College Hostel din a ngai a ni a ti. Sum deh chhuah kawngah Mizoram tan bik chuan thiamhnang leh puantah a pawimawh zual tih a sawi a. Mizo kutchhuak te awlsam zawka hralh a nih theih na’n Delhi khawpui a Dilli Haat ang deuh, Emporium tam zawk India ram khawpui lian deuhah te Central sawrkarin a buatsaih sak a ngai a ni a ti.
He larsap inkhawmpui hi President Ram Nath Kovind chuan a hawng a, sawihona inkhawm hrang hrang neih chhunzawm nghal a ni a. Heng sawihona zinga pakhat, Parallel Session for Breakaway Group ‘A’ – Tribal Issues-ah larsap hian thu a sawi ve a ni.