Lai Students’ Association (LSA) Gen. Hqrs. Lawngtlai chuan Lai Autonomous District Council (LADC) sawrkar buai vanga Budget pass theih a ni lo chu pawi an tih thu leh Budget pass theih loh vanga zirlaite leh mipuiin harsatna an tawk chho mek chu ṭha lo an tih thu an sawi.
Hemi chungchangah hian nimin khan thuchhuah siamin LSA chuan Budget pass a nih theih nan Congress Legislature Party Leader, Opposition Leader leh United Legislature Party Leader te hnenah nimin khan ngenna an thlen tih an sawi a. Thla thar, December ni 3-a LADC Session lo awm turah Budget pass a nih theih nana hma la tur leh thil dang zawng zawng aia Budget chu dah pawimawh hmasa turin an ngen a ni.
LADC Budget Session neih lai kumin July ni 29 khan Congress sawrkar, Chief Executive Member T.Zakunga kaihhruai chu rintawklohna ‘motion’ put luh a ni a; High Court-in LADC chu a awm dan pangngaia awm zui tura a dah avangin sawrkar chu buk theih a ni ta lova, hemi tum Budget Session-ah hian Budget chu pass theih a nih tak loh avangin thla 4 pumhlum dâwn chu Budget nei lovin LADC sawrkar a kal ta a ni.