Serchhipah Republic Day hmang

Nimin khan ram chhung hmun dangte rualin Serchhipah Republic Day vawi 71 na chu Khawtetlang playground-ah hman a ni a, khuallian, District Bawrhsap, Dr. Lalzirmawia Chhangte, IAS chuan hnam puanzar pawt pharhin, chibai buktute a chhanglet nghal a ni.

Zing ni chhuah rualin sawrkar pisaahte hnam puanzar zar a ni a, chumi hnuah zing dar 7-ah Khawtetlanga Republic Day lawmna hi hman a ni a, he huna thusawitu, khuallian chuan India ram mipuiten keimahni danpui siam ngei kan hman tanna champhaah ram hruaitu hmasate zahna chibai bukin, an inpekna zarah ram hmasawn leh nuam tak kan nei thei a ni, a ti a. Remna leh muanna hnuaiah hmasawnna tam tak Mizoram pawhin neiin, Serchhip district ngei pawh nasa takin hma a sawn zel a, vawiinah chuan India rama ziak leh chhiar thiam tamna ber district kan ni ta hial a ni, a ti.

Khuallian hian district chhunga tunhnaia District chhunga hmasawnna hna-thawh langsar zualte sawiin, inkalpawhna kawng tha zawk a awm theih nana PMGSY sum hmangin kawngpui engemaw-zat laih a nih thu leh hnathawh mek a nih thute, Central Road Fund sum hmanga Tuichang lei 68 mtrs a sei dawn hna thawh mek a nih thute a sawi a, Ram hmasawn tehna pawimawh Infant Mortality Rate ah serchhip chu 7.9 a nih mek thute, Maternal Mortality Rate 0 a nih thute, 2019 chhunga Malaria avanga boral kan neih loh thu-te, kum 2019 chhungin District hospital-ah nau piang 336 an awm thute a tarlang a. Primary School zirlai 1757 leh Middle School zirlai 3206 hnenah zirlaibu leh uniform a thlawna pek a nih thute a tarlang a, Serchhip DIET aṭangin mi 64-in Diploma in Elementary Education Course an zirchhuah tawh thu leh an zinga 23-ten sawrkarah zirtirtu hna an hmuh tawh thute a sawi bawk.

Police Department-in kum 2019 chhung min 100 lakah case an register thu leh mi 79 chargesheet niin, mi 27 te convict an nih thu a sawi a, Thenzawl Police Station leh Serchhip Bazar beat post-ah te CCTV dah a nih thu a sawi bawk a. AH&Vety Deptt. hmalakna a sawi zingah kum 2019 chhungin artui hralhna `3,38,289 sawrkara chhunluh a nih thute leh khua zawng zawngah free mass vaccination neih a nih thute a sawi a, nikum chhungin Mat phai, Zawlpui zauva Horticulture Deptt. hnuaia loneitute thlai thar chhuah cheng nuai 410 man hralh chhuah a nih thu a sawi a, Agriculture Deptt. hnuaiah pawh FOCUS hmangin district chhung khaw 42-ah lian taka hmalak mek a nih thu a sawi a. Blue Revolution Scheme hnuaiah dil thar laihna mi 17 leh sangha no khawi lenna mi 9 hnenah leh Fishermen House mi 5 pek an nih thu a sawi a. Sericulture Deptt. hnuaiah pangang tui 6510 leh Mulberry chin tur kuang 2,00,000 sem chhuah a nih thu te, reeling cocoon Kgs. 1017 leiin , Deptt. farm aṭangin cocoon 78,000 chuang an thar thu a sawi bawk.

Kumin chhungin MGNEREGA hnuaiah inhlawh-na ni 81 siam ni tawhin cheng nuai 2431.41 hman a ni tawh tih a sawi a, kumin March thla ral hmaa ni 100 inhlawhtir hman tumin ruahmanna siam mek a nih thu a sawi a, PMAY(G) hnuaiah chungkaw 69 insak ṭanpuina pek an nih tawh thu a sawi a, UD&PA Deptt. hnuai-ah PMAY(U) hmalakna-in 1st DPR-ah chhungkaw 1822 leh 2nd DPR-ah chhungkaw 985 tan insak ṭanpuina phalsak a nih tawh thu leh sum pawh cheng nuai 814.8 dawn a ni tawh a, CLSS hmanga in sak ṭanpuina pawh bank hrang hrang 9 kaltlangin chhungkaw 130 hnenah pek tum a nih thu a sawi.

PHE Deptt. hnuaiah Jal Jeevan Mission kaltlangin thingtlang khua zawng zawnga chhungkaw tinten tui connection an neih vek theih nan hmalak tum a nih thu leh kumin Macrh thla hian khaw 18-ah tui connection pekfel tum a nih thu a sawi a, National Afforestation Programme hmangin ram 145 hectare-ah VFDC kaltlang leh 4450 hectares-a zauah GIM kaltlangin thing phun a nih thu a sawi bawk a. Serchhip District-ah ration card chi (category) hrang hrangah 17486 awmin, retailer 98 an awm thu a sawi a, Legal Metrology-in dan bawhchhia mi 17 an man thu leh LPG phur truck 129 leh Tank lorry 136 an endik thute, dan bawhchhia driver 5 hrem an nih thu leh diesel phur motor pakhat thawn kir a nih thu a sawi bawk.

DLAD Office chuan NEDP sum cheng nuai 530 leh State Finance Commission aṭanga cheng 138.07 leh Excluded Area Fund cheng nuai 459.98 te chu khaw hrang hranga hmasawn-na hnathawh nana hmana nih thu a sawi a, District bawrhsap chuan ram ngaw leh nungcha-te humhalha, kangmei laka ram venghim tura mipuite sawmin, Republic Day lawmnaa kalte hnenah lawmthu a sawi a ni.

Parade Contingent 7 awmin, tiṭha thlan chhuahte hnenah Khuallian hian lawm-man a sem nghal a, lawmman dawngtute chu: Pakhatna Student Police Cadet, Marian High School, pahnihna Government JM High School leh pathumna NCC, Serchhip High School te an ni a. Parade Commander hi SI Hrangchhuana, 3rd Bn. MAP a ni

Republic Day pual hian Serchhipa Home hrang hrang te, Hospital leh Jail ah te thilpek hlan an ni a, District Volleyball tournament buatsaih a ni bawk a, lawmman te chu khuallian hian a sem nghal bawk a ni.

Kumin Republic Day hi Pathianni a nih avangin VIP at Home programme erawh chu siam a nilo a ni.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram