Bungtlang Lungzawl Zau Mat lui-a Suspension Bridge dawh tur lungphum chu Agriculture Department Director Rohmingthanga Colney chuan Lei dawhna tur hmunah Nilaini chawhnu khan a phum.
Lungphum phumna pual inkhawmah Agriculture Director chuan thusawiin, kuthnathawktute tana ṭangkai tak tur lei dawh tura hmalakna a awm chu lawmawm a tih thu a sawi a, Agriculture Department chuan hmasawn zawnga kal an tum thu sawin, hemi kawnga an hmalakna ah FOCUS Project a lo awm chu an ṭangkaipui thu leh, kuthnathawktute pawhin an ṭangkaipui ngei a beisei thu a sawi bawk.
Serchhip DAO Tlang-timawia Zote kaihhruai inkhawmah hian Agriculture Department Joint Director leh State Project Director, FOCUS nibawk RK Nithanga chuan tuna an lei dawh tur chu FOCUS hnuaia an lei dawh hmasak ber tur a ni tih sawiin, a tira ruahmannaah chuan tun thla chhunga zawh tur nimahse Bungtlang khuaah hri leng a hluar avanga Containment Zone-ah hun rei tak puan a nih avang leh hnathawktute pawh luh theih a nih loh avangin hna hi ṭan tlai a ni tih a sawi a, amaherawh chu tun sawrkar kum chhunga zawh ngei an beisei thu leh sum pawh a awmsa vek thu sawiin, hna hi thawh zawh a niha Completion Certificate pek tlak a nih chuan pekchhuah ve nghal tur a nih thu a sawi bawk.
He Suspension Bridge dawh tur hi ₹16,47,771/- senga dawh tur niin, meter 82 a thui tur a ni a, Rolins Engineer, Aizawlten lei dawh hna hi an thawk a, tunah hian Anchor Block chu thawh zawh a ni tawh a, tun sawrkar kum chhung ngeia zawh hman an tum thu hnathawktute chuan an sawi a ni.