Commerce & Industries Minister Dr R.Lalthangliana chuan Chili (Tuipui)-a service tur Mar Boat chu mipui tana hman theih turin a vai liam.
Mar boat hi bialtu MLA Dr.R.Lalthangliana hian nikum khan ama MLA Fund atangin cheng nuai 15 sengin Tuipui ‘D’ pa, Lawng tuk thiam Pu R.Lalbela a tuktir a, feet 40-a sei a ni a, a engine pawh Burma lam aṭanga chah thlen a ni a, Pick-up full load pawh phur thei turin Thir tha chi hmanga tuk a nih thu he hunah hian tarlan a ni.
He Lawng service tur hi helai khaw chhehvel inkalpawh harsa lutukte tan awlsam leh zangkhai, man tlawm zawka hman theih tura siam a ni a, nimina a vailiam rual hian Dr. R.Lalthangliana hi ama motor nen Lawng hian phurin ral leh lam Muallianpui ram chu a chuangkai nghal a ni.
Minister chuan thu sawiin, “Helaia Lui lian tak maiin bial chhung khaw hrang hrang min daidan a, Leidawh hi a hautak a, Central-ah cheng vaibelchhe tel ka nawr mek tho a, mahse, a kal muan deuh avangin Lawng hmangin inkalpawhna hi siam ṭha tihna ka nei ta a, Lawng kai theihna tura ram petute chungah pawh lawmthu ka sawi a ni,” a ti.
Nimin vek khan Health Minister ni bawk Dr.R.Lalthanglianan Khawlailung PHC sak thar a tlawh a, NABARD RIDF XXIV sum cheng nuai 140.21 hmanga 2019-2020-a sak a ni.