Lawngtlai district-ah Myanmar ram buai vanga raltlan lut mi 5,300 an awm mek a, an zinga 98 te chu identity card siamsak an ni tawh.
Nimin khan Lawngtlai District Level Committee on Myanmar Refugees chu a ṭum hnih nan an Chairman, Lawngtlai Bawrhsap Dr Andrew H. Vanlaldika hovin an ṭhukhawm a. Task Group on Myanmar Refugees Nodal Officer report aṭanga a lan danin, tun dinhmunah Lawngtlai District chhungah Myanmar aṭanga raltlan lo lut mi 5,300 chhinchhiah tawh an ni a. An zinga mi 3,522 chu kum 18 chung lam niin, hmeichhia 1,739 leh mipa 1,783 an ni a, kum 18 hnuai lam mi 1,778 an awm bawk. An khawsakna, an ei leh in tur leh damdawi bakah, an mamawh hrang hrangte a ṭul dana ngaihtuahsak niin, camp hrang hrangah dan lam inzirtirna legal awareness campaign kalpui mek a ni. Raltlante chet vel dan uluk taka vil zui a nih theih na’n an mimal chanchin nen uluk taka chhinchhiah hna kalpui mek niin, raltlante hi ID card pe vek tura ruahman a ni a, tunah hian ID Card 98 siam tawh a ni.
Raltlan lo thleng tharte hi Covid-19 hri an kai leh kai loh endik hmasak zel niin, raltlan zingah hri kai mi 298 hmuh chhuah tawh niin, thihpui mi 1 a awm a, mi 14-in hri an vei mek a, Covid-19 hri danna la theite chu pek ve zel niin, dose khatna la tawh mi 1,553 leh la kim tawh mi 336 an awm.
Bawrhsap chuan chuan January ni 27 – 29 chhunga District chhung hmun hrang hranga raltlante inkulhna hmun a tlawhnaa a thil hmuh leh hmalak dan a tarlang a, Lawngtlai District chhunga Myanmar aṭanga raltlan awm mekte dinhmun leh mamawh thlirho niin, chhawmdawl leh enkawl zui zel dan turte sawi ho a ni bawk.