Nimin khan Mizoram Science Centre, Berawt-lang, Aizawl chuan Polar Satellite Launch Vehicle (PSLV C31) leh Radio Controlled Model Airplane te chu mipuite tana hmuh leh belhchian theih turin a phochhuak.
Heng model pahnihte phochhuahna hunah hian Er. H.Lalsawmliana, Chief Scientific Officer leh Member Secretary, Mizoram Science Centre chuan thusawiin, tunlai khawvel thiamna mil zela inher rem a pawimawh a, Polar Satellite Launch Vehicle chu India hmai tiuangtu khawl ropui tak a nih thu leh, tun thla February ni 14 mai pawh khan a vawi 54-na atan kahchhuah leh a nih thu sawiin, satellite ṭangkai tam tak vansang lamah a dah chho tawh a ni a ti a, Mizo zirlai naupangten anmahni tiphura titui thei tur hmuh mai theih tur an nei ta chu lawmawm a tih thu a sawi a. Mizoram Science Centre staff te pawh an thiamna pholang zel turin a chah bawk a ni. Radio Controlled Model Airplane pawh thlawhna design siamdan, her danglam dante leh a ṭhat dan enchhin nana siam niin, helama tuimite bakah zirlai naupangte leh mipuite thinlungah chona leh phurna thar a pek ngei a beisei thu a sawi bawk a ni.
PSLV C31 model hi Mizoram Science Centre-a technical Staff-te kutchhuak niin, Lalrinnungi, Education Assistant, Mizoram Science Centre chuan Polar Satellite Launch Vehicle chung-changah presentation pein a nihphung leh pawimawhna chi hrang hrangte a sawifiah a, a tak tak aiin 1:7 ratio-in a tê zawk a ni.
RC Model Airplane thung hi Innovation Hub, Mizoram Science Centre a Mentors te leh Mizoram Aeromodellers Association-te nen ṭangkawpa duan chhuah a ni a, Zonunkhuma, President, Mizoram Aeromodellers Association chuan tuna Radio Controlled Model Airplane hi an association-in an kut an thawh tawhnaah chuan a lian ber a la ni a, a technique hi a sangin an tan pawh a cho awmin a phurawm hle thu a sawi a. A thla hmawr pahnihte inkar hi feet 14 lai a nih thu leh runway atan pawh metre 200 laia thui a mamawh thu sawiin, lei lama control-tu atanga km 1 leh a chanve a hla ah a thlawh tir theih thu a sawi bawk a ni. Petrol engine 50cc hmangin boruakah a invawrh kang thei a ni a ti bawk.