Cheng nuai 230.73 senga sak “Chhawnzinga Lui Water Supply Scheme” Chanmari West, Aizawl-a mi chu nimin khan Deputy Chief Minister Tawnluia’n a hawng.
Chhawnzinga Lui Water Supply Scheme hi Hunthar, Edenthar bakah Chanmari West hmun ṭhenkhat a cheng mihring 4200 vel chawm tura ruahman a ni a, Atal Mission For Rehuvenation and Urban Transformation (AMRUT) 2017-2019 kaltlangasiam niin, Chhawnzinga Lui tui hna put pali (4) lakkhawm hmanga châwm tur an ni. Chanmari West mawngah Chhawnzinga Lui Pump House sak a ni a, he Pump House aṭang hian Edenthar Reservoir awm sa tui litre nuai 2 dawng leh AMRUT (2017-19) hnuaia sak Hunthar Reservoir tui litre nuai 1.3 dawngah pump luh a ni.
Hawnna inkhawmah Tawnluia chuan Chhawnzinga Lui chu tunhma chuan tuihna ṭha leh Aizawl khawpui pawhin an hriat lâr, hmun pawimawh tak a ni ṭhin a, mimal ṭhahnemngai intelkhawmin kum 1960 chho khan Aijal Water Company dinin, he lui tui hi an khuap a, mipui hnenah an hralh ṭhin a, mi tam takin an chhawr ṭangkai ṭhin a ni, a ti a, kum 1970 khan PHED-in leiin an enkawl chhunzawm tih a sawi a, khuarel chhiatna vangin kum 2015 khan hman tlak lovin a chhia a, PHED-in theihtawp chhuahin hma a la a, ruahmannate siamin a hlawhtlinna kan hmu ta hi a lawmawm a ni, a ti.
Tawnluia chuan Aizawl khawpuiin an tlan chu Phase –I leh Phase-II a awm a, khawlte a upat tawh avangin pipeline thlengin thawm ṭhat a ngai a, sawrkarin theihtawp chhuahin hma a la a, khawlte thlak a nih bakah thawm ṭhat ngaite thawm ṭha a ni a, hei hian awmzia a nei ṭanin hmasawnna hmuh a ni ṭan tih a sawi a, tunah chuan nitin tui litre maktaduai 28 – 30 pump theih a ni tawh tih a sawi a, amaherawhchu hei hian Aizawl mipui mamawh a la phuhru zo lova, SIPMIU in tunah hian Tlawng lui tui lakna tur khawl an bun mek a, Aizawl Hmar lamin an chhawr tur ruahmanna siamin an thawk mek tih sawiin, pipe phum hna pawh thla hnih chhunga zawh hman a beisei thu leh kum thar lamah khawl bun hna hi zawh fel beisei a nih thu sawiin ruahman ang chuan nitin tui litre maktaduai 28 vel pump theih a nih tur thu a sawi bawk.
Aizawl Chhim lam veng hmun hniam deuh chawm turin Tawi tlang aṭang Gravity-in tui lâkna project thawh mek a nih thu pawh sawiin, nakumah zawh fel theih beisei a nih thu a sawi bawk a, nitin tui litre maktaduai 15 pek theih beisei a nih thu a sawi bawk.