Nimin khan Serchhip District AH &Vety Department buatsaihin Vawk pul hri African Swine Fever (ASF) hri leng thawh hnihna thleng mek chungchang sawihona AH & Vety Conference Hall, Serchhipah neih a ni a, he huna kal khawmte chuan District pawn aṭanga vawk lakluh khap an duh thu an sawi.
Nimina ASF chungchanga hmalak dan tur sawihona hun hi Dr.R.Lalmakthanga, DVO, Serchhip chuan kaihruaiin, Dr. R.Lalmakthanga chuan ASF hri leng thawhkhatnaa hmalak dante sawilangin, nikum, kum 2021 April ni 16-ah Serchhip District-a ASF hri kai chu Keiṭumah hmuh hmasak ber a nih thu te, hemi hnu hian District chhung khaw 29-ah he Vawk pul hri hi leng zuiin, he hri leng vang hian District pumah vawk 3899 an thi laiin, vawk 3040 suat an nih thu a sawi a, tunah hian ASF hri leng thawh hnihna a rawn len leh mek avangin inralrin ṭul an tih thu a sawi a, tunah hian he hri vanga vawk thi nia rinhlelh pakhat sample chu test tura Bhopal-a an thawk mek thu a sawi bawk.
Nimina kalkhawmte hian District pawn aṭanga Vawk lakluh khap nise an duh thu sawiin, vawk In leh a vel vawng fai tura inhriattir nise an ti a, ASF hri leng avanga vawk thi an lo awm leh thulhah ran talhna hmuna vawk phumna a indaih tawh loh avangin mahni ram chhungah a theih chin chinah inphum nise, VC-ten inṭawm tura ran phumna hmun tur ngaihtuah nise an ti bawk.
He hunah hian Serchhip khawpui chhunga VC aiawh te, Vawk vulh Association leh Society bakah Sazuar Association te, Sub-Hqrs. YMA Serchhip aiawh leh tualchhung thuthar thehdarhtute an kalkhawm a ni.