Skip to content
Home » Chanchinthar » Kolasib District MJA-in Hortoki leh Meidum inkar kawng siam hna thawh mek an tlawh

Kolasib District MJA-in Hortoki leh Meidum inkar kawng siam hna thawh mek an tlawh

Kolasib District MJA member te chuan Inrinni khan NABARD sum hmanga Hortoki leh Meidum inkar kawng siam hna thawh mek chu a hmunah kalin an en a, hna thawh mek chin chu a ṭha thawkhat rih viau niin an hria.

NABARD hnuaia Hortoki leh Meidum inkar kawng siam tur hi Phase hnihah then a ni a, kilometer 26-a thui tur a ni. Phase-I hi lei laih hna zo fel tawhin, boulder phah tan mek a ni. Phase-II zawk hi kawng laih hna thawh mek a la ni a, kawng chhuat hi meter 9 a zaua laih tur a ni a, kawng laih tawh chin chu a zau tha tawk viau nia hriat a nih rualin hmun thenkhatah mimal ram neituten zangnadawmna phuta an ram lak hek an rem tih loh avangin kawngpui laih zau zawng tura beisei tling pha lo tur a awm a, kawng hlui sira Electric ban 30 chu kawng laih zau a lo nih takah chuan sawn a ngai dawn a, hei hian Contractor-te tan hnathawhah harsatna a siam a, Electric ban sawnna senso atan hian Kolasib Power Division chuan PWD-ah senso tur Cheng Nuai 46 vel pe turin an phut a, hetiang senso tur hi kawng laihna tura DPR-ah a tel loh avangin PWD tan pek dan tur hriat a harsa rih hle niin thudawnna chuan a sawi.

Kolasib District MJA ten kawng laih mek an enna chinah chuan kawng laih hna thawh hi PWD engineer ten uluk takin an vil a, survey laia kawng sial tura ruahman tawh chu kawng hlui awmsa rin leh a nih tak avangin km 4 vel zetin ruahmanna tharah chuan kawng hi a tawi zawk dawn a ni.

Hortoki leh Meidum inkar kawng laih mek Phase-II ah hian Contractor pali – V.Lalbiakzama, Aizawl; KR Construction Ṭhuampui, Aizawl; Lalthanthuami, Chawnpui, Aizawl leh Zoramchhana, Electric Veng, Aizawl te chuan hna an thawk mek a ni.

Leave a Reply

This site uses Akismet to reduce spam. Learn how your comment data is processed.