Vawiin, May 17 aṭanga May ni 19 chhung hian Serchhip Indoor Stadium-ah 5th Mizoram Inter-District Wrestling Championship leh Mizo Inchai Title Fight Challenger zawnna neih a ni dawn.
Hemi chungchangah hian nimin khan a huaihawt-tute (Organising Committee) chuan Serchhip Press Club-ah thuthar thehdarhtu-te kawmin an hmalakna hrang hrang an hrilh a, thuthar thehdarhtute an kawmnaah hian K.Tlang-thanmawia, President, Serchhip District Wrestilng Association chuan Inter-District Wrestling Championship leh Mizo Inchai Title Fight Challenger zawnna hi Association-in a thleng a ni mai lova, Serchhip District pumin a thleng a ni a ti a, Serchhip khawchhung mipuiten hemi chhung chuan rilru zau tak pu a, khaw dang aṭanga mikhual lo kalten Serchhip rawn kal fo an châk theihna turin duat taka mikhualte lo dawngsawng turin a sawm a ni.
Organising Committee chairman C.Laldinpuia leh Secretary T.Lalengruala-te hnen aṭangin ruahmanna an neih dan leh an kaldan tur hrang hrangte ngaihthlak a ni a, Organizing Committee hnuaiah hian Sub-Committee panga (5) din niin, heng Sub-Committee hrang hrangte hian an chan ṭheuhah chak taka hma an lak thu an sawi a ni.
Inter District Wrestling championship-ah hian Mizorama District hrang hrang aṭangin wrestler leh official mi 100 bawr vel tel tura ngaih a ni a, vawiin hian khaw dang aṭanga he championship-a tel turten Serchhip an rawn pan khâwm ang a, naktuk, May ni 18 zingkarah inbûkna neiin, chawhma dar 10 aṭangin wrestling match neih ṭan tum a ni a, a hawnna hi chawhnu dar 1-ah Serchhip Indoor Stadium-ah neih a ni ang a, TC Pachhunga, Vice Chairman, Sports & Tourism Development Board-in a hawng ang.
Inter-District Wrestling Championship bikah hian Under 17 leh Senior category a awm dawn a, Under 17 mipaah kg 35 hnuai lam aṭanga inṭanin kg 60 chung lam thleng a awm ang a, weight category hrang hrang 9 a awm dawn a, Under 17 hmeichhiaah kg 36 aṭanga inṭanin kg 61 chung lam thleng awmin, weight category hrang hrang 8 a awm bawk ang. Senior mipa-ah kg 57 aṭanga inṭanin kg 96 chung lam thleng a awm ang a, weight category hrang hrang 8 a awm dawn a, hmeichhe senior-ah kg 50 hnuai lam aṭanga inṭanin kg 68 chung lam thleng a awm ang a, weight category hrang hrang 9 a awm dawn bawk a ni.
Mizo Inchai chak Title Fight challenger zawnna turah hian tun dinhmunah tel tur zat a la chiang lo a, mipaah pa lian – kg 80 chung lam; pa laihawl – kg 80 hnuai lam leh pate – kg 65 hnuai lam inchaia champion lai tum tur zawnna neih a ni ang a, hmeichhe lamah pawh, nu lian – kg 70 chung lam, nu laihawl- kg 70 hnuai lam leh nute – kg 60 hnuai lamah champion lai tum thei tur zawnna neih a ni dawn bawk a ni.