April ni 28, 2022-a ZPM Val Upa Council Meeting-in “ZPM party-a dinhmun pawimawh chelhtute leh MLA candidate tur te chu ruihtheih thilin a tihbuai loh an ni ngei tur a ni,”an tih chu Thawhṭanni khan ZPM Val Upa Council Secretary Prof.Thangchungnunga chuan an party chhung inkhawmah a puang.
ZPM Val Upa Council chuan, “Kalphung Thar champion pui tum kan nih angin, hruaitute chu nungchangah duhtui a ṭul hlein kan hria a, chuvangin party-a dinhmun pawimawh chelhtute leh MLA candidate turte chu ruihtheih thilin a tihbuai loh an ni ngei tur a ni,” tih resolution hi an siam a, he thu hi ZPM Party President Lalliansawta hnenah lo ngaihtuah a, tihhlawhtlin a nih ngei theih nan a hma la turin ziakin an thlen bawk a ni.