Nimin khan K.Lalrinliana, Food, Civil Supplies & Consumer Affairs Minister chuan a pisa-ah consumer-ten online-a complain an thehluh theihna tur web portal ‘e-Daakhil’ edaakhil.nic.in a hawng.
He hunah hian Supply Minister chuan Consumer-ten an thil lei leh dawnah lungawi lohna an neih changa awlsam taka an thlen theihna tur web portal hman theiha ruahman a ni chu lawmawm a tih thu a sawi a, consumer-te chanvo humhalh nan ṭangkai taka hman theih tura hman nuam taka siam a ni a, smart phone nei tan pawh an mobile phone aṭangin awlsam takin complain an thehlut thei dawn tawh a ni, a ti a. Online-a complain thehluh theihna hi kum 2020 kumtawp lam aṭang tawh khan sawrkarin a buaipui ṭan a, Covid-19-te leh rokhawlhna dang dang a lo awm ve avangin a puitling lawk thei lova, nimahsela theihtawp chhuah a nih hnuah a lo puitling ve ta a ni, a ti.
Minister chuan he online payment system buaipuina kawngah hian a tir aṭangin NIC, Mizoram chuan a buaipui a, NIC leh Department of Consumer Affairs, Govt. of India ṭangkawpin scheme an siam, CONFONET hian Mizoram pawh e-Daakhil lo puitlin theih nan hian theihtawp an chhuah avangin lawmthu a sawi bawk a ni.
Consumer-te zingah complain tur neite chuan he portal edaakhil.nic.in-ah hian lûta in-register-in complain a thehluh theih a, Complain thehluh hi Consumer Commission lam tan pawh bawhzui zung zung theih tura duan a ni bawk.
Consumer Commission-a thubuai thehluhte lo chingfel tur hian President leh Member-te district tinah lak an ni tawh a, State Commission-ah hian President leh Member 4 neiin an awm a, District Commission-ah hian President leh Member pahnih neiin an awm bawk a ni.
State Commission hian a din tirh aṭangin case 253 dawng tawhin, case 237 an chingfel tawh a, chinfel hmabak pending case hi 16 an nei a ni. District Commission-ah chuan district zawng zawng khaikhawm-in, din tirh a nih aṭangin case 4388 dawn a ni tawh a, heng zinga case 4354 hi chinfel tawh niin, pending case hi 37 a awm mek a, pending neih mekna hi Aizawl district-ah chauh a ni.
E-Daakhil hi Common Service Centre-te nen thlunzawm tawh a nih avangin hmun kilkhawra awmte tan pawh he centre kaltlang hian complaint a theluh theih dawn a, Consumer-in a thubuai neih hlut zawng aṭanga chhûtin cheng nuai 5 hnuai lamah chuan complaint fee pek a ngai dawn lova, nuai 5 chin chunglam chauh hian fee hi pek a ngai ang.
Lallianmawii, State Informatics Officer, NIC-in technical report a pein, David Lalthantluanga, Secretary i/c Consumer Affairs, K.Lalrohlua, Joint Secretary, V.Laldinsanga, Registrar, State Consumer Disputes Redressal Commission leh Mizoram Consumers’ Union lam aṭangtein hawnnaah hian an tel a, District dang aṭang hian Zoom Apps aṭangin DCSO te, District Commission Member-te leh CONFONET staff, Data Management Assistant-te an lo tel bawk a ni.