FIH Women’s Hockey World Cup, Spain leh Netherlands-a khelh mekah India chuan nizan hmasa khan Netherlands khawpui pakhat Amstelveen-ah an game hmasa ber an khel a, England nen 1-1 in an in-draw.

Wenger Hockey Stadium-a inkhelah ṭan aṭanga minute 9-na lekah England tan Isabelle Petter chuan goal khungin, hma an hruai nghal. An siphurh hi India tan Vandana Katariya chuan minute 28-naah a sut a ni.

Inkhelh ṭan tirh phatah England-in an nawr a, vawi hnih an nawrnaah goal an khung nghal. Hemi hnu hian India hian hmanhmawh lo taka khelin penalty corner aṭangin an si phurh an sut a. Third quarter-ah India an khel ṭha sawt a, ball an chang hnem a, goal pawh nawr an tum viau a. Mahse, England tlar hnung chu Maddie Hinge hovin an ding khawng tlat a. Counter-attack aṭangin goal an rawn khung lek lek fo.

Group B inkhel dangah China leh New Zealand-te pawh in drawin goal 2 ve ve an khung a ni.