Tunhnaia Mizorama ruihhlo hluar chho nasa leh a kaihhnawiha sualna pung nasa doletna atana Mizoram Police-in veng/khaw tina Village Defence Party (VDP) din tawhte tuai thar tur leh la din lohna hmuna din thar leh tura hma a lakna bawhzuiin Serchhip District Police-te pawhin hma an la mek a, nimin khan Serchhip District SP, Stephen Lalrinawma hovin Chhingchhip Venghlun Community Hall-ah Chhing-chhipa VDP tuai thar a nih leh theihna tura hmalakna hun hmanho a ni a, nimin vek khan Serchhip Police Station Conference Hall-ah Serchhip SDPO Kaste Romalsawma hovin Serchhip khawpui chhung bakah Keiṭum khuaa VDP leh Serchhip Sub-Hqrs. YMA hnuaia Anti-Drug Squad hotuten hun an hmang bawk.
Hei bakah hian nimin vek khan N.Vanlaiphaiah hetiang hun hi hman niin, Thenzawlah pawh nimin-piah khan hetiang hun hi hman a lo ni tawh bawk a ni.
VDP hi khawtlanga sualna hrang hrang thleng thei veng tur leh a dolet kawnga sawrkar tha tichak tura sawrkar hriatpuinaa din a ni a, an mamawhte pawh sawrkarin a pe ṭhin a ni.