Chief Minister Lalduhoma chuan, “MP kan inthlang dawn a ni a, ZPM chuan Delhi tlangah zawmpui kan nei lo a, hei hi kan danglamna a ni,” a ti.
Nimin chhun khan ZPM Party chuan Lok Sabha MP Election Campaign bul tan inkhawm Vanapa Hall-ah an hmang a, he hunah hian thu sawiin, Chief Minister chuan an MP chuan Issue based-in Parliament thurel pawh a thlâwpin a thlâwp lo mai dawn tih sawiin, “Hei hi kan tan chuan a him ber a ni. Central nena tha taka thawhdun hi kan duh a, amaherawhchu kan ram, kan hnam leh sakhaw tana him lo thilah chuan huai takin kan dodal mai dawn a ni. ZPM chu tualto party kan nih avangin tuna kan dinhmunah hian kan chiang a, kan awm reng dawn a ni. He kan dinhmun hi chiang taka min hriatsak turin mipute pawh ka ngen duh a ni. MP hi palai hna thawktu tur a ni a, a tirtu Mizoram sawrkar nena thawkdun thei a ni dawn a, project ûmzui ngai a tam hle thin a, hetiang bawhzui tur atan hian MP tha kan mamawh a ni. Tin, Zofate hmun hrang hrangah kan inzar darh nasa ta hle a, hengte enkawl thei tur hian MP tha kan mamawh hle em em a, MP tawng lama harsatna nei lo hnamdang kara lo khawsa reng tawh leh hre em em mai MP Candidate kan nei hian hmasawnna kawng tinrengah nasa takin kan tangkaipui ngeiin ka ring a, kan ramin a mamawh tak MP min thlantlin sak turin Mipuite ka sawm a ni,” a ti.
Lalliansawta ZPM Party President chuan MP Election Campaign bul tanna (Kick-Off) neiin, MP Candidate Richard Vanlalhmangaiha pawhin thu sawiin, “Zoram mipui hian ZPM hi enchhin min tum lo a, en tak tak min tum a ni. Mipuiten min beisei anga hna pawh kan thawh ngei ngei a ngai a, kan ram enkawl hna hi Pathianin kan kutah a dah a, a malsawm tlaka enkawl pawh kan tum tur a ni. MP-te hi central leh state inkar palai tur an ni a, Pathian zara ka lo tling a nih chuan he hna hi rinawm tak leh tha taka thawh ka tum a ni. Central atanga project leh scheme hrang hrang a tam thei ang ber hai chhuah kan tum dawn a, pawisa hi dik taka hman atan chuan central hian a ui reng reng lo a, rinawm taka hnathawh chuan project hai chhuah leh hmasawnna thilah harsatna a awm dawn lo a ni,”a ti bawk.
Richard-a chuan, “Prime Minister emaw, Chief Minis-ter emaw thu nilovin Pathian thu ka ngai pawimawh dawn a, Pathian thu ang zelin ka kal dawn a ni. House chhungah a ni emaw House pawnah a ni emaw kan ram, kan hnam leh kan sakhua tan theihtawp ka chhuah dawn a, ka thisen far tawp thlengin ka ding dawn a ni. ZPM policy Hand Holding policy tihlawhtling turin theihtawp ka chhuah dawn bawk a, kan state hian Emporium kan mamwh hle mai a, kan thil thar chhuahte pho chhuahna tur Emporium tha tak kan neih theih nan hma ka la dawn a ni. MP inthlan-ah hian vote a tla tlêm thin a, tun tum inthlanah chuan mipuite vote thlâk vek turin kan insawm a ni,” a ti bawk.
He hun hi W.Chhuanawma, MLA, Vice President, ZPM General Headquarters, MP (LS) Campaign Committee Chairman ni bawkin a kaihruai a, H.Lalchhawntluanga, Secretary, MP (LS)-in report pe-in Rev.Lalrinmawia, Ex-Moderator, PCI-in hunserh a hmanga a, zaithiam zai ngaihthlak a ni bawk.