Serchhip February 12, 2013: Mizoram a Congress Sawrkar, Pu Lal Thanhawla kaihhruai chuan PWD Officer lian an ngam lo niin Society for Social Action (SOSA) chuan nimin khan Aizawl Press Club-ah an puang.
Aizawl Press Club-a Press mite kawmin, SOSA President Pu SL Sailova IAS (Rtd) chuan, tuna sawrkar hrawn mek chuan an Election Manifesto hmasa berah ‘Kan sawrkar chuan eirukna chhui turin thuneitu sang tak Vigilance Committee kan din ang an ti a, tun thlengin an la din lo’ tiin, Eirukna chhui turin CBI te chu kawngka bulah kan dintir reng a lawm an ti a, eng angin nge an dintir tih kan hre lo a ti.
SOSA President chuan Mizoram sawrkarin PWD Officer lian an ngam lo tiin, PWD Engineer-in-Chief chu eiruk thubuaiah man a ni a, bail-a chhuahtirin, ni 60 vel an suspend a, an la lut leh mai a, an ngam zawng Vety Department Director chu rei tak an suspend a, Hrangbana College Principal pawh an suspend bawk tiin, PWD Officer lian erawh chu an ngam ngang lo niin a sawi.
Kum 2000 leh 2005 inkara Mizoram chhunga PMGSY sum hman dan chhui tu CBI chu chawlhtir a nih hnuah Supreme Court-in chhui chhunzawm turin thu a pe tih an sawi a, SOSA President Pu SL Sailova sawi danin, PMGSY sum hman felhlel chungchang hi kum 2006 khan an pawl chuan chanchinbu leh CAG report thawhchhanin, Gauhati high Court ah PIL an thehlut a, hemi hnu hian CBI chhuiin a hmawr an bawk \ep tawha ngaih a nih laiin nikum November ni 30 khan Mizoram sawrkar chuan an pawl hriat lohvin Supreme Court-ah Special Leave Petition an thehluh avangin CBI chuan an hna chhui lai an tawpsan ta rih a, he thu hi tlai khawhnuah an hria a, an hriat veleh Supreme Court-ah a doletna tur an thehlut a, Christian Legal Association pûrin ukil ten man chawi ngai lovin an din sak a, Supreme Court chuan CBI chhuitir leh turin thutlukna a siam ta a ni.
Mizoram khaw kar inkalpawhna siamna tur sawrkar laipui scheme PMGSY state chhunga hman \an kum 2000 a\anga 2005 inkar khan thil felhlel engemawzat a awm tih SOSA hruaitute chuan sawiin, National Rural Roads Development Agency in `164,60,39,000/- a pek chhuah hmangin khaw kar kawng hmun 71 siam turah 45 siam zo angin sawrkar chuan a tarlang a, amaherawhchu kawng an siam zinga kawng thar 11 sial anga an insawi an enfiah chuan kawng hlui kum 1999 a\anga MST bus te pawh an tlan \an tawhna a ni tih an hmu a, cheng vaibelchhe 8 hmanga Kawng awmsa 9 tihchang-tlunna nia an sawiah 5 chu ni khat chhunga thawh zawh vek a nih thu leh hemi hnu hian 4 dang pawh ni 1 chhung bawka thawhzawh anga tarlan a nih thu an sawi a, heng an thil hmuh te hi sum hman a felhlel reng em tih chianna tura an enchhin tlemte niin an sawi a ni.
Hetianga sum hman felhlel ni a sawi te chhui chiang tura an tih hi MNF sawrkar hun laia mi a ni a, amaherawhchu a chhui tir tute Congress sawrkar zawkin Court sang berah a khing chu mak an tih thu an sawi a, a chhan hi ngaihtuah tham a tling tih an sawi a ni.
SOSA Press Conference-ah hian an President Pu SL Sailo bakah Pu Rualzakhuma IAS(Rtd) Pu Lalhmingliana Saiawi IAS (Rtd) Pu F.Hmingthanga MCS (Rtd) leh Pu Bualhranga Dawrpui ten thuthar lakhawmtute hi an hmachhawn a ni.