14th MFA Cup semi finalist te chu an hriat chian ta a, FC Kulikawn leh Chanmari FC ten semi final an luh hnu-ah nimin khan MPL club pahnih FC RS Annexe leh Dinthar FC ten semi final an lut ve leh bawk.
1st MAP 0-1 Mualcheng FC
Semi-Final luh theihna chance nei, 1st MAP Academy hian 1-0-a Mualcheng FC an hneh lo a, Goal awm chhun hi first half tawp dawn Minute 44-a penalty aṭanga lut a ni a, Lalhlunmawia chuan he penalty hi goal-ah a chantir a ni.
Dinthar FC 6-1 Diakkawn FC
Group D match hnuhnung zawkah Dinthar FC chuan 6-1 laiin Diakkawn FC an sawp a, chiang takin Dinthar FC hian Semi-Final an lut ta a ni. Lalnunmawia chuan Dinthar FC tan hattrick siamin, minute 17′, 64′ 71′-ah te goal a khung a, R.Laldanmawia chuan goal 2 thunin (27′, 58). Zosangliana chuan goal khat (46’) a khung bawk a. Diakkawn FC tan hian Paul Ramfangzauva chuan minute 57-ah goal khat a khung ve a ni.
FC RS Annexe 0-0 Reitlang FC
Group C-a Semi-Final lut tur zawnnaah hian Reitlang FC hi an match hmasa zawka an chak zawh ve loh avangin Semi-Final lut tur chuan an chak ngei ngei a ngai a, mahse chak ngei ngei mamawh Reitlang FC hi an chak zo ta lova, Chance nei ṭha zawk FC RS Annexe hian Semi final an lut ta a ni. FC RS Annexe hian Khelh 2 atangin points 4 an hlawh chhuak a, Reitlang FC hian points 2 an hmu a, Hmangaihzuali FC hian point 1 an nei a ni,
Ningani-ah Semi-Final khelh a ni dawn a, Semi final hmasa zawkah FC Kulikawn leh Chanmari FC te an intum ang a, semi final hnuhnung zawkah FC RS Annexe leh Dinthar FC te an intum leh ang a. Final hi April ni 6, 2013 chawhnu dar 2 a khelh tur a ni dawn a ni.
Champion team in `1,00,000 an dawng anga, pahnihna hian `35,000 an dawng dawn bawk a ni. Tin, Semi finalist te hian `15,000 theuh an dawng dawn bawk a ni.