Kum 2030 a lo thleng ang a, Serchhip khaw mipui te hi tui avanga harsatna namen lo kan la tawk dawn a ni. Kan tui hna tam tak te a lo kangchat ang a, a mipui ten fimkhur leh inven nachang kan hriat loh avangin tui thianghlim in tur duh ang tawk kan hmu zo lovang a, tui kan hmuh that loh avangin kan hmun hma te a tawpin natna tha lo tam tak a lengvel ang a, thangthar te tan Serchhip hi khaw nuamlo leh chenna tlaklohah a la chang thuai dawn. Hei hi thlasik anga khel lova lo thleng ngei ngei tur a ni, mahse tun atanga kan lo inven lawk erawh chuan a tam zawk hi chu kan la pumpelh mai thei e. Chuvang chuan tuna Serchhip khaw mipui te hian tui avanga harsatna kan tawh mek hi a sukiang turin tih theih kan nei theuh a ni tih hria ila, tun atang hian tui hna humhalh turin beihpui i thlak tak tak teh ang u.
Kum 1994 chho bawr velah khan Serchhip leh Sailam inrina Bukpui atanga luang thla mat lui hi thal lai pawhin lian tak a ni a, Sailamkai li phei chu pa banpil tih thin a ni a, tui thiam nal viau tan lo phei chuan ral lehlama hleuh kai tur chuan hlauhawm tak a ni. Kum 19 a liam a, kum 2013-ah chuan Sailamkai li tih sawi mumal tur a awm tawh lo, a thuklai ber pawh khup thleng vela dai tham lek a ni ta! Naupang kum 5 mi vel tan pawh awlsam taka dai kai mai theih a ni tawh. Serchhip leh Kawlri tlang inkar a luang thla Mat lui zuk fintu Hmawngawn lui kan tih hi, kum 10 kalta velah kha chuan lui pangngai tak, len denna tham a ni. Mahse kum 2013-ah chuan tui tin 1 thal tur pawhin a tlin khawmna lai zawn deuh a ngai tawh. Ram lama kal thin te chuan tunhma a tui luanna thin luikawr vel a kangchat nasat zia kan hmu ang. Ram lama luikawr chu sawiloh kan inbul a tuikhur thlengin a kangchat mek anih hi. Hei hi engvang nge?
Tunlai hian Serchhip khua chu tui lamah kan harsa hle a, PHE Dept lamin theihtawp an chhuah chung pawhin tui harsatna hian ziaawm lam a pan thei meuh lo. Veng thenkhatah phei chuan tlaivar dawn dawna tuikang nghak sawi tur kan awm tan ta. Tun atanga kum 10 ah hian engang takin tui harsatna hi tawk ang imaw? Ngaihtuah mai pawh hian rilru hi a mangang lawk deuh nia!
Nakin lawkah tun aia harsatna namenlo hi Serchhip mipui te hian kan la tawk thuai dawn, chumi pumpelhna tur chuan tun atanga mipui te hi kan tanrual a tuihna kan siam belh leh kan humhalh hi mi zawng zawng tena kan thawh theih awlsam tak chu a ni. Thingtlang lam hian hei hi kan hrethiam lo fo thin, lo kan vat a ram kan hal duai duai ringawt a. Kan ngaihdanah chuan tunhma te angin kum 2/3 velah chuan ramngawah a chang leh anga a neih leh tlak thuai ang, kan ti mai thin. Mahse a ni hauh tawh lo. Kan khawvel hi a kum a telin a lumin kan boruak hi a bawlhhlawh zela chuvang chuan tunhmaa lo a kan neih hnu kum2/3 a ramngaw a chang leh mai ang kha a theih tawh loh. Tunlai chul ram te chu kum 10 hnuah pawh ramngaw a la insiam lo hi hmuh tur tam tak a awm. Kan ramngaw neih tha leh kan tuihna min siamsaktu ber lah chu engmah hre lovin kan vat duai duai bawk nen, he thil hi kan tihtawp vat loh chuan kan Zotlang ramnuam tak hi thlaler ram rovah kan la chantir thuai dawn. Mipuite i harh teh ang u.
Kan tuihna hmuhna tam ber hi kan thing leh mau te hi an ni, chuvang chuan ramngaw kan la neihchhun tlemte te hi kan humhalh a ram awllai apiangah ramngaw siamna turin thing phun kan uar thar leh hi a tul ta takzet a ni. Harsa vak lovin keini chuan kan generation hi kan la paltlang a ni thei e, mahse kan tu leh fate tan harsatna namenlo kan siamsak dawn a ni. He harsatna pumpelh na tur hian tuihna humhalh beihpui hi i thlak tak tak teh ang u. Tuihna humhalh te hi sawrkar kuta dah mai lovin VC,YMA, NGO leh Kohhran tin te hian theihtawpin i tlangaupui ila, mipui te hnenah a tam thei ang ber sawi darh ila tan kan lak tlan phawt chuan he kan khua hi thangthar te tan chenna tlak leh khaw nuam takah kan la chhuah thei mai thei asin. ‘Serchhip khua kan tui a hal e’ ti a kan au hma ngei hian tuihna humhalh turin Serchhip mipui zawng zawngte hian theihtawp i chhuah ang u.