VL Ruala, Serchhip

SEDAL ARSI LIAN A HER LIAM TA – Lalhmangaiha Chawngthu President, SEDAL. 6.2.2014

I am going very lonely,
Siar eng hnuaiah,
Chhawrthla a eng ruai e, vanah
I am longing for you.
When the moon eng riai hnuaiah,
Biangnote, do you call me?
Whistle in tah chuan min ko la,
But you no present sweetheart,
Don’t let me stay alone,
“I love you” min han ti langin sweetheart,
One time tal min Kiss rawh.

Mizo sipai vai rama awm, a bialnu ngaia lunglengin Mizo leh sap ṭawng inpawlh nawk a a lunglen hla a phuah, SEDAL kalkhawmnaa min sak sak ṭhintu Pu V.L. Ruala kum 81 chuan  13 Jan, 2014 khan min lo chawlh san ta. Lung a leng teh e.

VL Ruala, Serchhip
VL Ruala, Serchhip

Birthday lawm hnuhnung ber: 1932 Christmas ni takah N. Vanlaiphaia lo piang anih avangin a hmingah pawh Vanlalruala tih a ni. 2012 May thla vel aṭanga rilpui cancer vei a ni chungin SEDAL thiltih hona hrang hrangah min ho zel a. Kum 2013 Christmas-ni khan Serchhip Jawahar Lal Nehru Memorial Hospital Cabin-ah a tu leh fa ten a Birthday hnuhnung ber Cake zai tirin an lawmsak a. SEDAL member te pawhin cake hi kan eipui hlawm.

Zirna leh eizawnna: Primary chu N. Vanlaiphaiah a zir zo a, SialhawkaMiddle Anglo Venacular zo lehin G.M. H/S Champhaiah 1950 khan Class VII a zo leh a. Kum 1951-ah zirtirtu an neihloh tak avangin Class VIII a zir zawm ta lo a ni.

Kum 1952-ah Burma sipaiah lut vein rawngrut 94 zingah silai te chi (small arms) Arm drill leh Arm Training-ah a thiam be rte zingah a tel ve a.Instructor pawhin “Nang lo zirtir rawh” a ti fo ṭhin. Rawngrut zawhah ‘C’ Company Clerk-ah a ṭang ta a. Inzir chawpin Burma Type-Writer a hmang ve mai ṭhin.

Kawl ram sawrkarin Official ṭawng atan Burmese hman tur a tih tak thut avangin a hna atan pawimawh dawna a hriat avangin Kawl ṭawng a zir ve ta a. Class VII Level chu a pass ve a ni.

Burma sipaia a ṭan lai chuan 3rd Chin Batallion zohnahthlak ho, Paihte, Laizo,Falam, Halkha leh Mizo awm khawmnaah a awm a. An ṭawng pawh a thiam nual a, thu leh hla lamah a ṭangkaipui hle ṭhin.

Sipai aṭanga a ban hnuah Tahanah awmhmun khuarin Methodist Kohhran District Office-a Accountant hna a chelh a(1964-1974), a pension thleng a thawk leh a ni.

Nupui fanau: Kum1961-ah Lungchhuan nula, Lalinthangi nen inneiin fapa 6 leh fanu 2 an nei a. An fate pawhin nupui pasal neiin 2011 khan an inneih Golden Jubilee an lawm a. Nupa inngaina leh inhmangaih tak niin vawikhatmah Pi Lalinthangi hian an in a deng loa ni.

Serchhip-a an lo chhuk hnuah eichawp dawr siamin foreign puanthan te a zawrh hnuah ‘Foreign Ruala’ tih a ni ṭhin.

Kohhran lamah: Serchhip Presbyterian Kohhran-ah Sunday School zirtirtu kum 25 chawimawina kum 2002 khan a dawng a. Kum 1982-1984 chhung Tual Upa a thlan a ni bawk. A boral ni thlengin Nilai zan thupui hawngtu a ni.

Thu leh hla lamah: Nitin chanchinbu leh Magazine hrang hrangah thu chi hrang hrang a ziak ve ṭhin a.Inhnialna te pawh a chawk chhuak ve nual ṭhin. A thuziah lar deuh te chu –

1)    N. Vanlaiphai Damdawiin: March 28, 1944-ah Japan thlawhnain a bomb a. He Damdawiin tun thlenga lading reng hi Mizoram thil hlui humhalh te zingah telh ve ni rawh se a ti ṭhin. LPS Talk Show-ah pawh a hmel kan hmuh hlawm kha. Hei mai hi a la duhtawk lova, Japan sawrkarin Mizoram sawrkar-ah ‘War Indemnity’(zangna dawmna) a pe tur a ni, tiin theihtawpin a sawi ṭhin.

2)    Kangral inthawi: Lo hal zawhah pipu ten ramsa, rannung pawisawilo lo kang ve te hnena thupha chawina inthawi an lo neih theih dan ngaihnawm tak a ziak ṭhin.

3)    Thinglenbuang: Hla thu leh dictionary hrang hrang te ṭanchhana hmangin Thinglenbuang hi pipu ten thing engpawh, an ngaihsan deuh an lo kohna a ni. Thingkung bik a awm lo a ti.

4)    Nilai thawhṭan: Ningani kan tih hi a dik lo, Nilaithawhṭan tih hi hmanlai aṭanga hman ṭhin a ni, a ti ṭhin.

5)    Thla zing: Thenkhatin August thla hi thla zing an ti bik hi a dik famkim lo. Calendar an neih hmain Thla de aṭanga ni 15-ah arkai a deng a, ni 15 ah a ral leh ṭhin. Thla fang det hun aṭanga chhut tur, July-August te pawh thla zingin a huam thei a ti.

6)    Hnam inpumkhatna:  Mizo hnam peng hrang hrang kan inpumkhat theihna ṭha ber, MAL leh SEDAL etc ten kan uar tur chu Mizo ṭawnga ziah thuleh hla hi thehdarh chak ila, zaithiam ho CD te hia thlawnin sme ila, fiamthu, idol CD te hi semi la, kan inpumkhat mai dawn a ni, a ti ṭhin. Chubakah ZORO hi a tuipui hle bawk.

7)    Run in: Di in, Rangva in, Thilthlek in, Bilat in a awm ang bawkin Run in hi a awm a. Tun hi hnim, Di anga inching atana chih theih a ni. Hla thuah chenna In sawi nan kan hmang ta bik a ni, a ti. (Kum 2013 Krismas lai khan Serchhip Kawnpui North Branch YMA te chuan Pu Ruala a damlo chauh hle lai khan AOC pengah ‘Run In’ ah Isua lem kan dah ngat a, a faten a thla lain a mutna khumah an entir chu a lawm hle a ni).

Lehkhabu a ziak: Lehkhabu 2 a ziak a,chungte chu-

1)    Mizo Hnam dan deh: Phek 138-a chhah, Mizo insak dan leh a hmanraw hrang hrang, a lem Pu Vanneihtluanga ziah sak,Pi pute nun leh Mizo ṭawng ṭobul etc. ziahna. Prof Laltluangliana Khiangte-a’n Aizawl Press Club-ah kum2010 khan a tlangzarh sak.

2)    Arsi hming leh an thawhthu: Mizo ten arsi kan lo hriat dan leh an hming, an thawnthu ten en Cancer a vei tawh hnu kum2013 khan anmahni inah SEDAL leh sawmbik ten kan release sak.

TV lamah: Arsi hming leh an thawnthu hi Dr Malsawma(tunah Aizawlah a awm) Serchhip CMO hovin CD a chhuah tur a record a ni a. Amah Pu Ruala hi narrator niin Serchhip Cable TV ah leh Zonet lamah te, Zoram hmun hrang hrangah thawn darh a ni. Arsi hla a khar ani. Kan lo hmu hlawm emaw?

PuV.L. Ruala kum 81 mi, thu leh hla lama kan Arsi eng tak, Arsi chanchin min hrilh ṭhintu leh a tir lama hla mawi tak min sak sak ṭhintu chu 13 Jan, 2014 khan a lo her liam ta. Ni 14.1.2014 ah ropui takin Serchhip mipui ten kan vuiliam a, SEDAL ARSI LIAN A HERLIAM TA anih chu.

A nupui a tu leh fa leh SEDAL member te chuan Zangkhua, Siruk, Hmar Arsi, Dingdi puantah etc. a lan chhung chu kan theihnghilh tawh dawn lo anih hi.

Pu Rual, i la nung reng, kan zingah i la cheng reng a nia aw. Mahse mangṭha phawt mai le.

[A duh tan Pu VL Ruala nupui Pi Lalinthangi hi Phone no. 9856303338 ah biak pawh theih a ni e]

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram