A thlawna thisen pe tam te hnenah chawimawina hlân

Damlo a mamawh te hman tura Mizo zinga tlawmngaia thisen pe tam te chawimawina nimina Aizawl-a neihah thisen vawi 30 pe tawh, zaithiam Rebecca Saimawii leh vawi 29 ve ve pe tawh Zothantluangi leh Lalramtluangi te chawimawi an ni a, Mipa-ah ṭum 52 pe tawh Lalawmpuia Varte bakah tum 50 pe tawh Lalremruata leh tum 47 thisen pe tawh RC Rokhum te chawimawi an ni bawk.

He chawimawina hi India hmarchhak pum huap a thlawnna thisen pek chungchang zirna ni 2 awh tur nimina Aijal Club-a ṭanah hlan an ni a, he training hi Health Minister Pu Lalrinliana sailo in a hawng a ni.

Hmarchhak pum huapa thisen pek inzirtirna – NE India Regional Training Program on Voluntary Blood Donation hawnna hunah hian Pu Lalrinliana Sailo, Health & Family Welfare Minister chuan midangte nunna chhan nana thisen petu kal khawmte chu khuallian dik tak an nih zawk thu sawiin, National AIDS Control Organization (NACO) -in Mizorama HIV/AIDS natna darh zel tur ven leh mipuite zirtirna pek kawnga hma a lakna fakawm a tih thu a sawi a, ruahmanna dik leh hma lakna fel tak nena thawh chuan Mizoramah volunatry blood donation hi 100 a za a tlinchhoh ngei a beisei thu a sawi bawk.

Inkhawmah hian rampum huapa mimal thisen pe hnem ber Pu SK Singh, West Bengal mi hnenah minister hian thang chhuah kawr leh chawimawina thuziak a hlan a, kum 63 mi SK Singh-a hi ram pumah thisen vawi 100 pe tling awmchhun niin, vawi 117 midangte tan thisen a pe tawh a.

Mizo hmeichhe zinga thisen pe tam ber, Pi Rebecca Saimawii chuan midangte nun chhan nan chakna thahrui ngah leh thil tihtheihna danglam bik neih ngai lovin mahni thisen ngei pein ‘hero’ a nih theih a ni tih a sawi a, fa 2 a neih hnuah midangte tan thisen a pek tan chauh thu a sawi bawk.

He training hun hmang tura lokal Pi Vinita Srivastava, NACO Programme Officer chuan voluntary blood donation-ah Mizoramin hma a sawn mek thu sawiin heti chung hian nikum 2012 thlenga thisen pek zawng zawng zat belhkhawmah Mizoram chuan state 8 phak loh a la neih thu a sawia hei hi tanlakna tur nia a hriat thu a sawi bawk.

He Training-a tel tur hian Assam tih loh hmarchhak State AIDS Control Society aiawh palai an tel kim thei a ni.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram