Chakma Autonomous District Council inthlanna dik leh felfai taka kalpui tura din Mizoram People Forum hnuaia District Forum, Pu Onis Moy kaihhruai chu ṭhiah a ni.
Hemi chungchanga MPF General Secretary, Upa Lalramthanga sawi danin CADC Area-a MPF ṭhiahna thupek hi Synod Moderator, MPF President ni bawk, Rev. Lalramliana Pachuau-in a chhuah a, ṭhiah a nihna chhan chu MPF kalphung kalh leh hleih nei taka thil ti nia Observer ten an hriat vang a ni.
Thulakna tarlan danin Pu Onis Moy hi tun hmalama inthlanah MNF ticket-a lo ding tawh, tan lam nei anga ngaih theih a nih bakah PRISM President a nih bawk avangin thil tam tak chawhpawlha MPF kalpui chu a rem lovah MPF hotute chuan an ngai bawk a ni. Zawhna chhangin MPF Gen. Secretary chuan tuna MPF District Forum ṭhiah a nih tak avang hian tun inthlanna kal mekah hian MPF District Forum thar din hman a nih tawhloh a rin thu a sawia, an kal zel dan tur chu an hruaitu te’n an ngaihtuah dawn niin a sawi bawk.