Lai Autonomous District Council a Chief Executive member Pu C.Ngunlianchunga te chhungkua chuan nimin zing khan an Saza khawi lai, Mizoram Forest Wildlife Division Lawngtlai kut ah an hlan a. CEM te chhungkua hian Saza Note hi mipakhat hnen aṭanga lachhawngin thuneitute kut ah hian an hlan a ni.
He hunah hian Pu Ngunlianchunga chuan Nungcha humhalh kawngah Lai Autonomous District Council chuan theihtawpa tan a lakthu sawiin,,Buhvum ram leh Fungkah khawhlui ram te chu Wildlife Sunctuary atan ruahman a ni a, Mizoram Wildlife Board pawmpuina nghah mek a ni a, heng Sunctuary enkawlna tur pawh Council Sawrkar lam chuan a ruahman vek tawh a ni a ti.
Lai District chhunga Ngengpui Wildlife Sunctuary leh Phawngpui National Park te chu tuna aia nasa zawka humhalh ṭul a tih thu CEM hian a sawi bawk.