Zothlifim Logo
Loading ...

Mi 17 in nunna an chan phahna tunhnaia Laipuitlang leimin-a chhiatna nasa tak thlenna chhan chhui chianna Magisterial Inquiry Report-1 ‘Laipuitlang Landslide’ tih chu nimin khan Aizawl Dist Magistrate Dr Franklin Laltinkhuma’n GAD Secretary Ashwani Kumar hnenah a thehlut a, report kimchang hi mipui hriat tura tlangzarh a la ni lo a ni.

Tun thla ni 11-a PWD building chimin chhiatna a thlen chungchang report hi phek 29 a chhah a ni a, hetah hian he chhiatna thlenga mawhphurtu ni a ngaih te leh building chim chhan te pawh tarlan a nih rin a ni.

PWD building chim avang hian mi 17 in nunna an chan bakah hliam engemaw zat an awm a, In 10 a chhiat bakah lirthei leh thil dang engemaw zat a chhe tel bawk a ni.

He thil thleng avang hian pawl ṭhenkhat chuan FIR thehlutin kum 2010 khan PWD building hi a khik ṭan tawh thu te, vawi engemaw zat PWD hotute dawr a nih hnuah nikum October ni 19 khan ṭhiah phal chauh a nih thu leh kumin April ni 2 khan tender ti chhuaka ni 9 a ṭhiat tura work order pek a nih thu te an lo tarlang tawh a, he chhiatna a mawhphurtu te hi an phu tawka hrem tur leh a thil chan ang hlutna hu tawk pawisa pe turin an phut a ni.