Aizawl-ah nimin khan zu chhe in vangin mi 2 an thi a, midang 22 Aizawl Civil Hospital-ah enkawl mek an ni a, mi 4 chu an ngaihtuahawm hle.
Civil Hospital atanga thudawn danin, thi te hi, PC Lalromawia (24) s/o PC Hrangmawia, Maubawk leh Laldawngzela (21) S/o Khawlthangi Khawzawl Zuchhip veng te an ni a, damdawiin thlenpui an nih hnu rei vak loah an thi a ni.
Police te sawi danin, Zu chhe in zinga tel ve hmeichhe pakhat chu Salem Veng World Bank Road-a mi ni a sawi a ni a, zu pawh hi ama pekchhuah ni a rinhlelh niin, nikhaw hreloa a awm avangin a hnen atangin thuchiang hriat theih a ni rih lo a ni.
Mizoramah Kum 1997-a Zu Khapna Dan, Mizoram Liqour Total Prohibition puan atangin zu chhe in vanga thi zat chu 57 an ni tawh a, an zinga 7 chu hmeichhia an ni.