Trade and Commerce minister Pu Lalrinliana Sailo chuan Myanmar nena ramri insumdawn tawnna atana ruahmanna kal mek chu Mizo ṭhalai tam tak ten cheng nuai tam tak hailut tura sumdawnna a an zuan luh theihna tura a tih a ni, a ti.
Myanmar khaw pahnih Monywa (Monjua) leh Mandalay khawpui a North East India – Myanmar Regional Business Conclave a tel hnuah Aizawl-ah he thu hi sawiin, Trade and Commerce Minister chuan ṭhenawm state Manipura Moreh khua a insumdawn tawnna lian tham kalpui mek angin heng ruahmanna hi Zokhawthar ah kalpui ve ngei tum a ni a, hemi atan hian Zokhawthar Land Custom Station chu peihfel a ni tawh a, Champhai bula Melbuk Border Trade township pawh zawhfel a ni tawh tih a sawi. Pu Lalrinliana Sailo chuan tunhnai khan Zokhawthar aṭanga Rih kaltlanga Tiddim thlenga kawngpui siam tur chu sawrkar laipui leh Myanmar sawrkar chuan a pawm tawhin MOU ziahfel a ni tawh a, he kawngpui hi siam zawh a nih chuan helai insumdawn tawnna aṭang hian sum tam tak hailuh beisei a ni a ti a ni.
He Conclave-ah hian Pu Lalrinliana Sailo hi Myanmar Sagiang Region Chief Minister H.E. U Thar Aye nen inkawmna an nei a, hetah hian Myanmar Sagiang Chief Minister hi Zokhawthar land custom station hawn huna tel ngei turin a sawm a, Sagiang chief Minister hian tel ngei a tum thu leh rokhawlhna a a awm palh a nih pawhin a aiawh tal tirh a tum tih a sawi a ni. Trade and Commerce Minister hian India Look East Policy hnuaia Kaladan Multi Modal Transport Project hnuaiah Lawngtlai aṭanga Myanmar ramri thleng kawngpui Km 100 a thui sial a nih thu sawiin, he kawng hi Zorinpui Land custom station Square Km nuai 1 a zau hmun chu pawh tur a nih thu leh hemi atang hian Sittwe lawng chawlhna thlenga pawh tura hmalakna kalmek te a hrilh bawk. Trade and Commerce Minister hian Manipur-a Moreh khua a Myanmar nen insumtawnna hmun a a tlawh bakah Tahan leh Mizo hnahthlak chenna khua engemaw zat a tlawh bawk a. Myanmar-a Indian Chamber of Commerce leh Myanmar-a UMFCCI huaihawt Monywa leh Mandalay khawpui a North East India – Myanmar Regional Business Conclave ah hian Manipur Chief Minister leh Minister te bakah Nagaland minister te an tel bawk a ni.