Laipuitlang tuizem leh a sem chhuahna pipe-a tui put ru siamṭhatna atana sum ruahman cheng vaibelchhe 1.6 chu National Steering Committee (NSC) chuan a pawm.
Nimina sawrkar thuchhuah tarlan danin, kumin May ni 11-a Laipuitlang leiminah khan nunna, in leh lo tam tak chânna leh tawrhna rapthlak tak a thleng a, mi tam tak chu Laipuiltang tuizem leh a sem chhuahna pipe-a tui putru tam avangin tun thlengin thinthi-a mutna hun awm lo a, heng harsatna sukiang tur hian Sawrkar-in ruahmanna chak takin a kalpui zel a, North Eastern Region Urban Development Program (NERUDP) ADB sum hmanga hna thawh kal mek aṭangin he tuizem leh pipe-a tui put te hi siamṭhat a nih theih nan Mizoram Sawrkarin Urban Development & Poverty Alleviation Department kaltlangin he programmme-a Committee thuneitu sâng ber, National Steering Committee (NSC) meeting ni 24 June, 2013-a New Delhi-a neihah dilna a siam a. NSC Committee Member, Pu RL Rinawma, IRS, Principal Secretary, UD&PA Department-in Laipuitlang chhiat tawhna leh tuizem leh pipe siamṭhat dan tur proposal hi power point hmangin presentation a pe a, Committee Members te rilru a khawih hle a. Committee chuan tuizem leh pipe-a tui put te chu project-2 hna kal lai mek aṭangin a rang thei ang bera siamṭha turin leh a siamṭhatna atana sum ruahman chhin cheng vaibelchhe 1.6 chu rem tih a ni tih sawrkar thuchhuah chuan a tarlang.
NSC meeting-a tel Er. Valbuanga, Project Director, SIPMIU chu a rang thei ang bera Project Scope Variation Statement leh Estimate, MoUD leh ADB formal approval atana submit turin hriattir nghal a ni a. Pipe line-te siamṭhatna atan Mizoram Sawrkar chuan contract hna pawh a lo pe fel tawh a, a hma thei ang bera hma la turin Project-a mawh phurtu, SIPMIU, UD & PA Department chu a inbuatsaih mek a ni.
UD&PA Minister Pu Zodintluanga chuan, Laipuitlang tuizem leh pipe a tui put ru siamthat a nih theih nana chak tak maia officer ten hma an la chu Mizoram tan hna tha tak an thawk ani tiin tuizem leh pipe siamthat a ni tur hi a lawmawm hle a ni, a ti.