Mizoram News

Lungsen rama Sibinasora khaw miten an in an ṭhiat

Lunglei district-a Lungsen khaw rama Chakma-te’n dan lova khaw thar an din nia sawi, Sibinasora khua chu Lungsen VC, MZP leh MSU-te’n ṭhiata sawn chhuah an phut mek laiin Inrinni khan an khaw mite’n an ṭhiat.

Thulakna tarlan danin Sibinasora bawk-ah hian in 41 a awm a, hei hi June ni 30 ral hma ngeia ṭhiata sawn chhuak turin Lungsen VC, MZP leh MSU te chuan Mizoram sawrkar an phût a. He bawk-a awmte hian an in te an ṭhiat tawh nia an sawi chu an ṭhiat lo tih hriat chhuah a ni a, Inrinni khan Lungsen VC leh MSU te bakah he Tuichawng VC te a hmunah an kal a. Hetia an thlen thlak tak avang hian he bawk-a awmte hian an inte chu an ṭhiat ta a. In pakhat erawh chu helai rama loneitute chênna a nih avangin thlam angah ngaih sakin an ṭhiat ve ta lo a ni.

Inrinni-ah hian Police pawh ṭhahnem tak Sibinasora bawk-ah hian an kal a, mahse buaina chhuak a awm lova. He bawk an dinna ram hi Forest department Plantation hmun a ni a, a hma lama awm phaltu Environment and Forest department lam hian awm an phal tawhlo nia thudawn a ni bawk.

Sibinasora khua hi Lungsen VC leh khawtlang hruaitu dangte’n tunhma khan an lo enfiah tawh a; an hmuh dan chuan, he bawk hi ramdangmi dân lova Mizorama pêm lutte awm hmun khuarna remchang nia an ngaih avang leh dân lova khaw din an duh loh bawk avangin Sibinasora khuaa awmte chu June 30, 2013 ral hmaa ṭhiata sawn chhuak turin sawrkar leh khaw mite June thla bul khan an ngen a. A hma hian Lungsen V/C kaihhruaia kumin May ni 29-a joint meeting chuan, Sibinasora khua chu sawn chhuah a nih theih na’n a tawp thlenga ṭan an tum thu an sawi a; Lungsen VCP, Tlangmawia chuan, Sibinasora-a awmte chu hmun danga insawn chhuak turin March 15, 2013-ah an lo hriattir tawh niin a sawi a, puitling zinga a tam ber chu Tuichawng electoral roll-ah an awm niin a sawi bawk.

Sibinasora bawk-a chengte hi June ni 7 aṭang khan Tuichawng khuaah an insawn ṭan a. Tuichawng khua hi Sibinasora aṭangin km. 5 vela hla a ni a, mahse an chenna hluite an lo la ṭhiat lova. Hemi avang hian Lungsen VC leh MSU lungawilote chu a hmunah an kal ta a ni. Thulakna tarlan dan chuan he bawk-a chêngte hian Tuichawng khua-ah chênna in an nei sa vek a, chuvangin an invawm luha chenna turah buaina a awmlo niin a tarlang a ni.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram